Sileti ózeninde muz jarý jumystary júrgizildi

PAVLODAR. KAZINFORM — Ertis-Baıan óńirinde kóktemgi sý tasqyny qaýpi bar aımaqtarda daıyndyq is-sharalary kúsheıtile tústi. Aqtoǵaı aýdanynda Sileti ózeninde muz keptelisteriniń aldyn alýǵa baǵyttalǵan jarylys jumystary júrgizildi.

Sileti ózeni 3 óńirdiń — Aqmola, Pavlodar jáne Soltústik Qazaqstan oblystarynyń aýmaǵy arqyly aǵyp ótedi. Sondyqtan mundaı jumystardy ýaqtyly júrgizý tasqyn sýlardyń qaýipsiz ótýin qamtamasyz etýde asa mańyzdy. Sileti ár kóktemde Pavlodar oblysynyń Sholaqsor eldi mekenine qaýip tóndiredi.

— Jarylys jumystary ózen arnasynyń tar úsh ýchaskesinde júrgizildi. Jumystyń jalpy aýdany shamamen 1000 sharshy metrdi qurady. Muz qabatyn álsiretý úshin 126 kılogramm jarylǵysh zat qoldanyldy, — dep atap ótti óńirlik tótenshe jaǵdaılar departamentinen.

Budan soń mamandar muz qabatyn álsiretý boıynsha qosymsha is-sharalar ótkizedi. Muzdy usaqtap kesip, seń keptelisiniń aldyn alady.

Eske sala keteıik, 2024 jyly qutqarýshylar Pavlodardaǵy Sholaqsor aýylyn tasqyn sýdan aman alyp qalǵan edi. 

Sol jyly Jalaýly aýylynda 14 úıdi sý basyp, tótenshe jaǵdaı rejımi jarııalandy.