Sileti ózeninde muz jarý jumystary júrgizildi
PAVLODAR. KAZINFORM — Atalǵan ózenniń arnasy tasysa Aqtoǵaı aýdanyna qarasty Sholaqsor aýylyn basyp qalý qaýpi bar.
Sileti úsh oblystyń: Aqmola, Pavlodar jáne Soltústik Qazaqstan aýmaǵyn basyp ótedi.
Ózenniń Aqtoǵaı aýdany aýmaǵyndaǵy arnasynda muz keptelisin boldyrmaý úshin muz jarý jumystary júrgizildi. Mamandardyń aıtýynsha, ózende siresip jatqan muzdy sý kóterilmeı turyp jarý, qyzyl sýdy ótkizý qabiletin artady. Ózen arnasy Sholaqsor aýyly arqyly ótetinin eskersek, atalǵan is-shara eldi mekendi sý basý qaýpin azaıtýǵa yqpal etedi.
— Jarylys jumystary sý qoımalaryndaǵy muz keptelisteriniń aldyn alýǵa baǵyttalǵan. Jumystar ózen arnasynyń tarylǵan jerlerinde, tórt ýchaskede, jalpy aýdany 1154 sharshy metr aýmaqta júrgizildi. 144 kg jarylǵysh zat paıdalanyldy. Qazirgi ýaqytta qutqarýshylardyń jedel toby muzdy usaqtaý jáne kesý boıynsha is-sharalardy júzege asyryp jatyr, — dep habarlady óńirlik tótenshe jaǵdaılar departamentiniń baspasóz qyzmetinen.
Jarylys jumystary oblys ákimi bekitken ınjenerlik jumystar josparyna sáıkes júrgizilgen. Ony ázirleý kezinde ótken jyldardaǵy sý tasqynyna júrgizilgen taldaý, klımattyq boljamdar, sondaı-aq óńir aımaǵynyń erekshelikteri eskerilgen.
Eske sala keteıik, Memleket basshysy sý tasqynyna qarsy sharalarǵa basa nazar aýdarýdy tapsyrdy.