Slaımdar balalardyń densaýlyǵyna qaýipti me

NUR-SULTAN. QazAqparat – Jumsaq ári jabysqaq suıyqtyqqa uqsas slaımdar (oıynshyqtar) balalardyń densaýlyǵyna qaýipti me? Bul suraqqa QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń ókili Dana Qasqataeva jaýap berdi, dep habarlaıdy QazAqparat tilshisi.

«Qazaqstanda júrgizilgen monıtorıng barysynda 1,5 myńnan astam oıynshyq úlgisi tekserildi. Olardyń 916-y talaptarǵa saı kelmeıtini anyqtaldy (60 paıyz). Kóbinese talaptarǵa saı kelmeıtin oıynshyqtardyń 73 paıyzy Qytaı elinen, 26 paıyzy Túrkııadan ákelingen. Tekseris nátıjeleri boıynsha oıynshyqtardyń quramynan ýytty kórsetkishter anyqtaldy. Olar: fenol, farmaldegıd sekildi qaýipti kórsetkishter. Qalǵan 96 paıyzynda tańbalaý erejelerine saı emestigi jáne jaraqat alý qaýpi bar, jas erekshelikterine saı emes ekeni týraly qaǵıdalardyń buzylǵany anyqtaldy», - dedi Dana Qasqataeva.

Baspasóz máslıhaty barysynda komıtet ókili qazirgi tańda balalar qyzyǵyp oınaıtyn slaımdar densaýlyqqa qaýipti me degen suraqqa da jaýap berdi.

«Slaımdarǵa da taldaý jumystary júrgizilgen bolatyn. Ártúrli qospalary bar, ıisi ártúrli slaımdardyń talapqa saı emes úlgileri anyqtalǵan joq», - dedi Dana Qasqataeva.