«Slavıan bazary» festıvaline Qazaqstannan kim qatysatyny belgili boldy
«Vıtebskidegi Slavıan bazary» XXXI halyqaralyq óner festıvaliniń «Vıtebsk-2022» estrada ánshileriniń halyqaralyq baıqaýynda P.Chaıkovskıı atyndaǵy Almaty mýzyka kolledjiniń oqytýshysy Erik Tólenov (sahnalyq esimi Kyle Ruh), al balalar baıqaýy aıasynda Alınur Hamzın óner kórsetedi. Baıqaý 13-18 shilde aralyǵynda ótedi, oǵan 24 eldiń ókili qatysady.
«Dástúrli túrde ánshilerimiz joǵary oryndarǵa ıe bolyp, osy bedeldi festıvalde elimizdi abyroımen tanystyryp keledi. Árıne osynaý tolaıym tabys artıster men olardyń oqytýshylary atqarǵan aýqymdy jumystyń dáleli. Otandyq vokal mektebi bıylǵy jyly da joǵary deńgeıdi kórsetetinine senimdimin», - dedi Mádenıet jáne sport mınıstri Dáýren Abaev Erik Tólenovpen kezdesý barysynda.
Qazaqstandyq ánshiler jyl saıyn, naqtyraq aıtqanda 20 jyl boıy festıvaldiń eresekter men balalar baıqaýyna qatysyp, júldeli oryndarǵa ıe bolyp kele jatqanyn atap ótý qajet. Mysaly, Dımash Qudaıbergen-2015 jyly, Ádilhan Makın – 2019 jyly, Rýhııa Baıdúkenova – 2021 jyly bas júlde jeńip aldy. Sonymen qatar ár jyldary Álisher Kárimov pen Ernar Sádirbaev (Amre) júldeger atandy.
Bıyl balalar baıqaýynyń qazylar alqasy quramyna halyqaralyq baıqaýlardyń laýreaty, qazaqstandyq tanymal ánshi Álisher Kárimov kirip otyr. Buǵan deıin festıvaldiń qazylar alqasynyń quramynda Roza Rymbaeva, Naǵıma Esqalıeva, Erlan Kókeev, Tolqyn Zabırova, Batyrhan Shókenov, Qarlyǵash Ábdikárimova, Qarlyǵash Ájıeva bolsa, Dımash Qudaıbergen «Vıtebsk-2021» estrada ánshileriniń halyqaralyq baıqaýynyń qazylar alqasynyń eń jas múshesi boldy.
Festıval jalaýyn Roza Baǵlanova atyndaǵy «Qazaqkontsert» memlekettik kontserttik birlestiginiń ánshisi, «Slavıan bazary-2021» baıqaýynyń Gran-prı ıegeri, «Daryn» jastar syılyǵynyń jáne «Shapaǵat» medaliniń ıegeri Rýhııa Baıdúkenova kóteredi.
