«Slavıan bazary-2015» festıvaline Qazaqstan atynan ánshi Dımash Qudaıbergen qatysady

ASTANA. QazAqparat - Búgin Belarýste «Vıtebskide Slavıan bazary» halyqaralyq óner festıvali ashylady. Oǵan Ázerbaıjan, Armenııa, Bolgarııa, Italııa, Kýba, Meksıka, Polsha, Reseı jáne basqa da elderden 21 jas oryndaýshy qatysady. Qazaqstan atynan Dımash Qudaıbergen shyǵady.

Festıval 9-13 shildede ótedi. Qaǵıdaǵa sáıkes olardyń 15-i fınalǵa shyǵyp, 20 myń dollarlyq Gran-prıge talasady.

Festıval aıasynda sondaı-aq «Vıtebsk-2015» XIII halyqaralyq balalar mýzykalyq baıqaýy ótedi. Onda ár elden 20 qatysýshy synǵa túsedi. Qazaqstan atynan 10 jastaǵy Lýıza Nurqýatova óner kórsetedi.

Eresekter baıqaýynyń ádilqazylar tobyn RF-daǵy Ázerbaıjannyń Tótenshe jáne Ókiletti Elshisi, ánshi Polad Bıýlbıýl-ogly basqarady. Balalar baıqaýyna Reseı halyq ártisi Dmıtrıı Malıkov tóraǵalyq etedi.

Gala-kontserttiń qurmetti qonaqtary reseılik estrada juldyzdary men shetelden kelgen ánshiler bolmaq. Atap aıtqanda, «Eýrovıdenıe» jeńimpazy norvegııalyq Aleksandr Rybak, brıtandyq ánshi Sofı Ellıs-Bekstor, nemistiń Dschinghis Khan toby, ıtalıandyq Ricchi E Poveri toby qatysady.