«Slavıan bazarynyń» júldegeri Jasmına Túzelova: Kelesi maqsatym — Eurovision
ASTANA. KAZINFORM — «Slavıan bazary» óner festıvaliniń júldegeri, qazaqstandyq ánshi Jasmına Túzelova bala kúngi eń úlken armany — Eurovision án baıqaýyna qatysyp, jeńimpaz ataný ekenin aıtty. Bul týraly ol Jibek Joly telearnasynyń «Búgin Live» baǵdarlamasynda málimdedi.
Jas ónerpazdyń aıtýynsha, halyqaralyq baıqaýǵa daıyndyq uzaqqa sozylǵan. Repertýardy tańdaǵanda birneshe án qarastyrylyp, aqyrynda daýys múmkindigine barynsha saı keletin shyǵarmalarǵa toqtaǵan.
— Baıqaýǵa uzaq daıyndaldyq. Án tańdaǵanda birneshe nusqany qarastyrdyq. Aqyldasa kele, daýys ereksheligime barynsha saı keletin shyǵarmalardy tańdadyq. Sonyń nátıjesinde qazaqtyń halyq áni «Saryarqa» men «Romashka-Vasılek» ánderin oryndadyq, — dedi Jasmına Túzelova.
Ánshiniń aıtýynsha, baıqaýda ózine erekshe áser qaldyrǵan qatysýshylardyń biri — Rýmynııa ókili.
— Maǵan Rýmynııadan kelgen qatysýshynyń óneri qatty unady. Ol opera janrynda án aıtyp, Dımashtyń repertýaryndaǵy shyǵarmany oryndady. Sondaı-aq Bolgarııadan kelgen qatysýshynyń daýysy da óte ádemi boldy, — dedi ol.
Jasmına Túzelova «Slavıan bazaryndaǵy» jetistigi shyǵarmashylyq jolyndaǵy mańyzdy beles ekenin aıtty.
— Ózim Eurovision án baıqaýyna qatysyp, jeńimpaz atanýdy armandaımyn. Bul — meniń eń úlken maqsatym, — dedi ánshi.
Aıta keteıik, ótken jyly osy baıqaýda Almagúl Battalıevaǵa gran prı jeńip alǵan bolatyn.
