Slavıan áıelderi kúzdi ózen jaǵasynda qarsy alady
ASTANA. QazAqparat - Jomart kúz ózimen birge molshylyq pen baılyq ala keledi. Jurtshylyq jazda úsh aı boıy ter tógip, baǵyp-kútken baqshasynyń eginin jıyp, qýanyshty sátti qaýym bolyp toılaıdy. "Ár eldiń salty basqa..." degenmen, bul "Egin merekesin" álemniń túkpir-túkpirindegi túrli ult ókilderi bir adamdaı atap ótip, barsha syıy úshin Tabıǵat-Anaǵa alǵysyn jaýdyrady, dep jazady massaget.kz.
21 qyrkúıek kúni dál osy merekeni slavıan jurtshylyǵy toılaıdy eken. Barsha álem jurtshylyǵy sekildi, slavıandar úshin de "Egin festıvali" - pisken egindi jınaýmen qosa, otbasy ál-aýqatynyń artýyn toılaýǵa arnalǵan mereke. Barlyq aýyl turǵyndary bir otbasy múshesindeı birige otyryp egindi jıyp, ony qoımalarǵa tasyp, dándi-daqyl, jemis-jıdekterdi tazalap, yzǵarly qysqa daıyndaıdy. Osymen túzdiń jumysy aıaqtalady. Kógerip kóktem jetkenshe nár bolatyn negizgi qor jınalady. Egin merekesin slavıandar Qudaı-Anaǵa (Jer-Ana) alǵys bildirý arqyly atap ótedi. Olardyń senimi boıynsha Qudaı-Ana aýyl sharýashylyǵyn, otbasyn, ásirese analardy qorǵaıdy jáne amandyq-saýlyq beredi.
"Osenına" dep atalatyn bul meıram aty aıtyp turǵandaı slavıandar tilindegi "Osen" sózinen týyndaǵyn. Asyǵa kútken aıtýly oqıǵany shyǵys slavıandary óz tanym-túsinikterine saı erekshe salttarmen toılaıdy.
Mysaly, bul kúni barlyq úılerde "ot jaǵý" salty oryndalady. Sol ottyń qyzýyna jylynyp, janyp jatqan aǵashtyń syqyrlaǵan dybysyn estı otyryp, aıaq basqaly turǵan sýyq mezgilge ishteı daıyndalady. Al, sol kúni aýyldaǵy áıelder qaýymy tań sáriden turyp, "Osenınany" ózen jaǵasynda qarsy alady. "Áıelderdiń qurmet kórsetýi" atalatyn dástúr boıynsha jaǵada jıylǵandardyń ishindegi jasy úlkeni sulydan pisirilgen nandy aınalasynda án salyp turǵan jas áıelderdiń sanyna qaraı bólip, onymen úı janýarlaryn qorektendiretin bolǵan.
Endi bir qyzyqty salt "jas jubaılarǵa qonaqqa barý" dep atalady. Egin merekesi kúni jas jubaılardyń barlyq týma-týys, dos-jarandary jınalyp, olardyń turmysyn kórip, keńes berý maqsatynda qonaqqa barady. Aldymen, áıel adam úı ishindegi jaǵdaıyn kórsetse, keıin er adam aýlasy men qora-qopsysyna kirgizip, óziniń otbasylyq ómiri oryndy júrgizilip jatqanyn pash etedi. Keıin, barsha qonaqqa óz aýlasynda dastarhan jaıyp, syra usyný arqyly qurmetin bildiredi. Egin mol bolyp, sheksiz baılyqqa kenelgen jaǵdaıda bul mereke tipti aptalap toılanady eken.
Jalpy, slavıan halqy "Osenına" merekesin úsh ret toılaıdy, " Birinshi Osenına" qyrkúıek aıynyń 14 juldyzynda bolsa, kúzdi ekinshi ret qarsy alý, atap ótkendeı 21 kúni, al sońǵysy osy aıdyń 27 juldyzynda bolady.
Kesh bata barsha qaýym bir dastarhan basyna jıylyp, tátti dámnen aýyz tıip, tań atqansha án salyp, bı bıleý arqyly qarym-qatynasty nyǵaıtady.
