Slanets gazyn ıgermes buryn qoldanystaǵy zańnamaǵa ózgerister engizý qajet - Sh. Ótemisov
ASTANA. 24 qazan. QazAqparat - Elimizde slanets gazyn barlaý men óndirý jumystaryn bastamastan buryn qoldanystaǵy zańdarǵa tıisinshe ózgerister engizý qajet.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Shavhat Ótemisov osylaı málim etti.
Depýtattyń aıtýynsha, búgingi tańda álemdik energetıkalyq naryqta balamaly energııa kózderin, slanets gazyn keńinen qoldanýǵa jáne kómirdi paıdalanýdyń jańa tehnologııalaryn engizýge baılanysty eleýli ózgerister bolyp jatyr. Máselen, sońǵy úsh jylda AQSh-ta gazdyń baǵasy úsh esege deıin tómendep, bul energetıkalyq saıasatty jáne naryqtaǵy básekelestikti túbegeıli ózgertken. Eýropalyq Odaqta balamaly energetıka baǵdarlamasyn júzege asyrý Eýroodaq elderinde gazdy tutyný mólsheriniń qysqarýyna alyp kelse, al Polsha qazaqstandyq ken oryndaryna uqsas kómir ken oryndary aınalasyndaǵy slanets gazdaryn keńinen ıgerýde.
«Qazaqstanǵa kelsek, Úkimet oryn alyp jatqan ózgeristerge laıyqty den qoıý maqsatynda aldyn ala is-qımyldar jasaýda. Osy jyldyń basynda energetıka máselelerine arnalǵan Úkimet otyrysynda kómir ken oryndary aınalasyndaǵy slanets gazdaryn izdeý jumystaryn júrgizýge jáne slanets gazdary ken oryndaryn ıgerý tájirıbesi bar áriptesterdi tabýǵa tapsyrma berilgen edi. Alaıda Úkimet tarapynan ekologııalyq zańnamaǵa ózgerister engizýge bastama jasalmaýy, bul jumystardyń qarqyny qoıylǵan mindetterdiń ózektiligine saı emestigin kórsetedi. Osy máseleler sheshilmeıtin bolsa, geologııalyq-barlaý jumystaryn shuǵyl bastaý da kúmán týdyrady. Óıtkeni slanets gazyn óndirý jerasty sýlaryn lastaý boıynsha eleýli ekologııalyq táýekeldermen baılanysty», - deıdi Shavhat Ótemisov.
Onyń paıymynsha, slanets gazyn barlaý men óndirý jumystaryn bastamastan buryn, tabıǵat pen jer qoınaýynyń lastanýyn boldyrmas úshin Ekologııalyq kodekske, «Jer qoınaýy týraly» Zańǵa jáne basqa da kóptegen zańdarǵa tıisinshe ózgerister engizý qajet.
