SkyTrain, LRT, metro jáne kóshelerdi uzartý: Almatyda qandaı jumys atqarylyp jatyr
ALMATY. KAZINFORM – Almatyda qalalyq máslıhattyń kezekti XLVI sessııasy ótti.
Sessııa barysynda depýtattar tarapynan qoǵamdyq kólik jumysyna qatysty turǵyndardyń aryz-shaǵymy áli de tolastamaı otyrǵanyn atap ótti. Qala ákimdigi ókilderinen jol-kólik baǵytyndaǵy máselelerdi sheshý úshin qandaı jumys atqarylyp jatqany suraldy. Onyń ishinde depýtattard LRT jelisiniń qashan iske qosylatyny qyzyqtyrdy.
Jol ınfraqurylymyn damytý basqarmasynyń basshysy Oljas Shabdanov 2024 jyly qaladaǵy qozǵalys sapasyn arttyrýǵa baǵyttalǵan kólik qańqasynyń master-jospary bekitilgenin málimdedi.
LRT
Onyń aıtýynsha, bıyl LRT jelisiniń qurylysyna daıyndyq jumystary bastaldy. Qazirgi ýaqytta Tóle bı kóshesiniń boıyndaǵy eski relsterdi bólshekteý jumystary júrgizilip jatyr. Uzyndyǵy 18,3 shaqyrym bolatyn jeli Indýstrıaldy aımaq pen depodan bastalyp, Momyshuly kóshesi arqyly Tóle bıdiń boıymen, Abylaı han dańǵylymen «Almaty-2» vokzalyna deıin sozylady.
— Aıdyń sońynda tikeleı qurylys-montajdaý jumystaryna kirisýdi josparlap otyrmyz, — dedi ol.
Metro
Sondaı-aq ol metropolıtendi damytý jumystary da jalǵasyp jatqanyn aıtty. Onyń sózinshe, maýsym aıynyń sońyna deıin «Qalqaman» beketindegi negizgi jumystardy aıaqtaý kózdelip otyr Sodan keıin iske qosý-retteý jumystary bastalady. Nysan 2026 jyldyń jeltoqsan aıynda qoldanysqa berilmek. Sonymen qatar «Qalqaman» beketinen «Barlyq» bazaryna deıingi 5,3 km metro jelisiniń qurylysy bastalady. Qazir bul aýmaqtaǵy ınjenerlik jelilerdi basqa jerge kóshirý jumystary júrgizilip jatyr.
Al metronyń «Jibek joly» stantsııasynan áýejaıǵa deıingi uzyndyǵy 14 shaqyrym bolatyn jáne 8 stantsııadan turatyn jelisiniń tehnıkalyq-ekonomıkalyq negizdemesi ázirlenip, memlekettik saraptamaǵa joldanǵan. Saraptama qorytyndysy shilde aıynda shyǵady dep josparlanǵan. Sondaı-aq «Saıran» stantsııasynan Alataý qalasyna deıingi jeliniń de (21 shaqyrym, 12 stantsııa) tehnıkalyq-ekonomıkalyq negizdemesi daıyndalyp jatyr.
Odan bólek SkyTrain jobasy boıynsha jobalaý-smetalyq qujattamany ázirleý úshin bastapqy málimetterdi jınaý jumystary bastalǵan.
Kóshelerdi uzartý
Oljas Shabdanov qaladaǵy joldardy damytý baǵytynda da aýqymdy jumystar qolǵa alynǵanyn málimdedi. Qazirgi ýaqytta Úlken Almaty aınalma avtokólik jolyna shyǵatyn 6 joldy uzartý jobasy iske asyrylyp jatyr. Ótken aptada Saın kóshesiniń uzartylǵan boıymen kólik qozǵalysy ashyldy. Onyń aıtýynsha, bul Momyshuly kóshesi men Rysqulov dańǵylyndaǵy keptelisti azaıtýǵa múmkindik berdi.
Jyl sońyna deıin Rysqulov dańǵylynyń Ońǵarsynova kóshesinen qala shekarasyna deıingi ýchaskesinde (2,3 shaqyrym) qozǵalysty iske qosý josparlanyp otyr. Jalpy radıaldy joldar boıynsha jumystardy 2027 jyldyń sońyna qaraı tolyq aıaqtaý kózdelgen. Joldardyń jalpy uzyndyǵy shamamen 50 shaqyrymǵa jetedi. Onyń 18,1 shaqyrymy qalalyq aýmaqqa, 31 shaqyrymy oblysqa tıesili.
Sondaı-aq qala ishindegi negizgi magıstraldy kóshelerdi — Tóle bı, Aldar Kóse, Jubanov, Muqanov jáne Hmelnıtskıı kóshelerin uzartý jumystary júrip jatyr.
— Bıyl Tóle bı kóshesiniń boıymen (4,5 shaqyrym) kólik ótetin joldy qamtamasyz etýdi josparlap otyrmyz. Sondaı-aq Jubanov kóshesiniń Alataý dańǵylynan qala shekarasyna deıingi bóliginde de qozǵalys ashylady, — dedi basqarma basshysy.
Qoǵamdyq kólik sapasy
Shabdanov qoǵamdyq kólik sapasyn jaqsartý baǵytyndaǵy sharalarǵa da jeke toqtalyp ótti. Naýryz aıynan bastap baqylaý-jelilik qyzmetiniń pılottyq jobasy iske qosylǵan. Búgingi tańda 1200-den astam zań buzýshylyq anyqtaldy. Avtobýstardyń ýaqyt aralyqtaryn, qyzmet kórsetý sapasy men tasymal qaýipsizdigin baqylaýdy kúsheıtý úshin bul qyzmettiń shtatyn 200-den 325 qyzmetkerge deıin ulǵaıtý josparlanǵan.
Eske salaıyq, buǵan deıin Almatyda avtobýstar Saın kóshesiniń uzartylǵan bóligimen júre bastaıtynyn jazǵanbyz.
