Skype boıynsha qońyraýlar braýzer arqyly da qoljetimdi bolady
ASTANA. QazAqparat - Skype paıdalanýshylary kompıýterge qosymshany ornatý qajettiliginsiz-aq braýzerden tikeleı qońyraý shalý múmkindigine ıe bola alady. Bul týraly ROSBALT Microsoft kompanııasynyń blogyna silteme jasaı otyryp habarlady.
«Biz Skype-ty paıdalanýdyń jańa tásilin qosamyz. Endi Skype-ke tek kez kelgen ekran arqyly qosylyp qana qoımaı, braýzer arqyly sóılese alasyzdar. Biz Skype-tyń veb úshin beta-versııasyn iske qosqanymyzdy jarııalaımyz», - delingen kompanııanyń habarlamasynda.
Qońyraýdy bastaý nemese Skype chaty arqyly sóılesýdi bastaý úshin paıdalanýshy servıstiń saıtyna kirip, onda óz málimetterin tirkeı alady. Mátindik chatty paıdalaný úshin qosymsha áreketter qajet emes, al aýdıo jáne vıdeoqońyraýlar úshin, braýzer úshin keńeıtý ornatý kerek bolady.
Skype-tyń veb-nusqasy saıahattaýshylar úshin, kompıýter arqyly ınternet-dámhanalar men qonaqúılerde jumys isteýge májbúr paıdalanýshylar arasynda suranysqa ıe bolýy múmkin.
Skype-tyń veb-nusqasyn kompıýterler úshin barlyq tanymal braýzerler Internet Explorer, Chrome, Firefox jáne Safari paıdalana alady. Bastapqyda veb úshin Skype-tyń beta-nusqasy paıdalanýshylardyń az ǵana bóligine qoljetimdi bolady, alaıda taıaý ýaqytta ony jasaýshy oǵan degen paıdalanýshylardyń qoljetimdiligin búkil álem boıynsha ashýǵa ýáde berip otyr.
