Skydance Media kompanııasy Paramount medıaholdıngin 8 mlrd dollarǵa satyp alady

ASTANA. KAZINFORM – AQSh-tyń Federaldyq baılanys komıssııasy (FCC) Skydance Media kompanııasynyń Paramount Global medıaholdıngin satyp alý jónindegi 8 mlrd dollarlyq mámileni maquldady. Bul týraly ABC News habarlady.

Kelisimge CBS, Paramount Pictures jáne Nickelodeon arnalaryn ıelený kiredi.

Federaldyq baılanys komıssııasynyń tóraǵasy Brendan Karr Skydance kompanııasynyń CBS telearna jelisine túbegeıli ózgeris engizýge umtylysyn quptaıtynyn jetkizdi.

– Amerıkalyqtar dástúrli ulttyq jańalyqtar medıa quraldarynyń oqıǵalardy tolyq, dál jáne beıtarap túrde berýine senýden qaldy. Ózgeris ýaqyty keldi, – dedi ol.

Buǵan deıin AQSh prezıdenti Donald Tramp eldegi buqaralyq aqparat quraldary men tanymal telejúrgizýshilerge qarsy málimdeme jasap, CBS News telearnasyn ıelenetin Paramount Global kompanııasy Kamala Harrıspen suhbatqa qatysty talap-aryzdy retteý maqsatynda 16 mln dollar ótemaqy tólegenin aıtqan bolatyn.