Skybender jobasy: Google drondary 5G ınternetin taratady
ASTANA. QazAqparat - Google kompanııasynyń jer sharyn dúnıejúzilik jelimen qamtý jóninde birneshe kólemdi jobasy bar. Internetti áýe sharlarynan basqa, kún batareıalarymen jumys isteıtin avtonomdyq drondar taratýy múmkin. The Guardian basylymy jazýyna qaraǵanda, Skybender ataýyna ıe bolǵan bul joba aıaqtalyp, synaqtan ótkizý kezeńinde tur.
Google-diń ushqyshsyz basqarylatyn apparattarynyń kómegimen 5G ınternetke symsyz baılanys ornatýdy kózdep otyrǵany habarlandy. Atalmysh jeliniń qosylý jyldamdyǵy 4G júıelerine qaraǵanda 40 ese joǵary bolady. Ázirge jobanyń negizgi máselesi - bul qamtý qashyqtyǵynyń az bolýy, ıaǵnı LTE-termınaldarynan on ese tómen. Máseleni málimetterdi fokýstelip taratýdyń kómegimen sheshýge bolady, alaıda ázirge bul ádis óte qıyn ári kóp qýatty talap etedi.
Google-diń ushqyshsyz basqaralatyn apparattaryn Nıý-Meksıkoda synaqtan ótkizip jatqany habarlanyp otyr. Eger ol tabysty ótse, kompanııa jyldamdyǵy joǵary ǵalamtordy búkil álemge «taratyp jiberetin» myńdaǵan drondy jasaýdy josparlap otyr.
