«SKY SERVICE» tikushaq apaty týraly túsinikteme berdi
ALMATY. QazAqparat - Búgin Almatyda tikushaǵy apatqa ushyraǵan «SKY SERVICE» kompanııasy qaıǵyly oqıǵaǵa baılanysty túsinikteme berdi, dep habarlaıdy QazAqparat.
Kompanııanyń habarlaýynsha, Airbus Helicopters EC 130T2 tikushaǵy qulaǵan jerden jaqyn jerde qozǵaltqysh jumysynyń parametrin tirkeýshi apparat tabyldy. Mamandar bul apparattyń qaıǵyly oqıǵa týraly biraz derektiń basyn asharyna senimdi.
«Bul quraldar qozǵaltqyshtyń jumysyn tirkep otyrady. Muny óndirýshi zaýyttyń ózi ornatqan. Tergeý jumystarynyń nátıjesinde qural tárkilenip alyndy. Áýe kemesiniń tizgininde bolǵan Valentın Shıtov barlyq talaptardyń saqtalýyn qamtamasyz etken. Ushýǵa shyǵýǵa barlyq ruqsat qujattary bolǵan», - dedi kompanııanyń baspasóz qyzmetinen.
Áýe kemesiniń eksplýatanty - «SKY SERVICE»AQ habarlaýynsha, tikushaq «Aeroekspert» JShS tehnıkalyq ortalyǵynda tehnıkalyq qaraýda bolǵan. Sońǵy ret tehnıka 2019 jyly 9 qańtarda tolyq tekserýden ótken. Tikushaqtyń ıesi «Taý Logıstık Way» JShS.
Aıta ketý kerek, qaıǵyly oqıǵa keshe Almatyda Naýryzbaı aýdanyna qarasty Taý samaly shaǵyn aýdanynda boldy.
«Alataý» shıpajaıynyń ashyq aýmaǵyna «Sky Service» áýe kompanııasynyń menshigindegi Evrokopter-130 tikushaǵy qulady.
51 jastaǵy ushqysh Valentın Shıtov jedel járdem kóliginde qaıtys boldy. Tikushaq «Boraldaı-Úlken Almaty» kóli baǵytynda ushyp bara jatqan.
Al kóliktegi PD qyzmetkerleri atalǵan derekke baılanysty isti QR QK 344-babyna sáıkes sotqa deıingi tergeý reestrine tirkedi (Áýe kóligin paıdalaný kezinde jol qozǵalysy erejelerin buzý).
Tergeý jumystary bastaldy.
