Sky Service áýe kompanııasy men qulaǵan tikushaq jaıynda ne belgili
ASTANA. QazAqparat - «QazAqparat» tilshileri Sky Service áýe kompanııasyna tıesili apatqa ushyraǵan Eurocopter 130 jaıly málimetterdi jınastyrdy.
«Sky Service» áýe kompanııasy 2005 jyly qurylǵan. Kompanııa tikushaqpen kommertsııalyq ushýlar men jergilikti jerlerdi monıtorıngileý jáne avıatsııalyq-qutqarý jumystary salasyndaǵy qyzmetterdi usynady. Áýe kompanııasynyń 12 tikushaǵy jáne 2 ushaǵy bar. Kompanııanyń áýe parkinde Eurocopter jáne Bell Helicopter TEXTRON zaýyttarynyń tikushaqtary bar.
Eurocopter 130 - Frantsııanyń Eurocopter kompanııasy 2017 jyly shyǵarǵan kóp maqsatqa arnalǵan tikushaǵy. Sky Service kompanııasynyń saıtyndaǵy málimetterge sáıkes, ol diril men shýyl deńgeıi óte tómen, 6 oryndyǵy bar sýperzamanaýı, barynsha tyńǵylyqty oılastyrylǵan áýe kemesi sanalady. Ushaq saǵatyn 220 shaqyrymdy qashyqty baǵyndyryp, 620 shaqyrym jerge deıin bara alady. Áýe kemesi kez kelgen kúrdeli mindetti oryndaýǵa múmkindik beretin zamanaýı quraldarmen, navıgatsııalyq jáne radıoelektrondy jabdyqpen jabdyqtalǵan. Tikushaqtyń bul modeli 7540 metr bıiktikke deıin kóteriledi.
Sonymen qatar áýe kompanııasynda QR Kólik jáne kommýnıkatsııalar mınıstrligi Azamattyq avıatsııa komıteti bergen № KAZ-02/048 jumystaryn oryndaýǵa múmkindik beretin kýáligi bar. Demek, kompanııanyń Qazaqstan men TMD elderi aýmaǵynda júkterdi jáne jolaýshylardy charterlik tasymaldaýǵa, avıatsııalyq jumystardy oryndaýǵa quqyǵy bar.
Buǵan deıin Almaty qalasynyń Naýryzbaı aýdanyna qarasty Taý samaly shaǵyn aýdanynda tikushaq apatqa ushyrap, ushqyshtyń qaza tapqanyn habarlaǵan edik.
Sondaı-aq tikushaq apatyna qatysty tergeý jumystary bastalǵandyǵyn jazdyq.
