Skrollıng dáýirinde kitapqa qyzyǵýshylyqty qalaı oıatamyz

ASTANA. KAZINFORM — Saýalǵa jýrnalıst, aýdarmashy, baspager, «Sarasóz» jýrnalynyń negizin qalaýshy ári bas redaktory Gúljaz Qarybek jaýap berdi.

Skrollıng dáýirinde kitapqa qyzyǵýshylyqty qalaı oıatamyz
Vıdeodan alynǵan skrın

Spıkerdiń kitap oqýǵa degen qyzyǵýshylyǵy Túrkııada magıstratýrada bilim alyp júrgen kezinde artqan. Sol kezde ǵylymı jetekshileri tildi jetik meńgerý úshin balalar ádebıetin oqýǵa keńes bergen. Osydan keıin ol kórkem ádebıetke den qoıyp, balalarǵa arnalǵan birneshe shyǵarmany qazaq tiline aýdarǵan.

— Túrik jazýshysy Fatma Gúnerdiń «Dostardyń mahabbaty» atty balalarǵa arnalǵan shyǵarmasyn aýdardym. Sondaı-aq qyrǵyz jazýshysy Aıdarbek Sarmanbetovtiń «Adam bolam» kitabyn qazaq tiline tárjimaladym. Munyń barlyǵyn dıssertatsııa jazýmen qatar alyp júrdim. Kún saıyn kitap oqýǵa jáne aýdarmaǵa arnaıy ýaqyt bóldim, — dep bólisti Gúljaz Qarybek Jibek Joly telearnasyndaǵy «Búgin Live» baǵdarlamasynda.

Spıker balanyń kitap oqýǵa qyzyǵýshylyǵyn arttyrýdaǵy ata-ananyń róline de toqtaldy. Onyń aıtýynsha, balaǵa kitap oqýdy buıyrýdan góri birge oqyp, mazmunyn talqylaý áldeqaıda tıimdi.

— Balamen birge kitap oqyp qana qoımaı, ony taldaý kerek. «Sen osy taqyrypta ne oılaısyń?» dep pikirin surap, ashyq sóılesken jón. Biz kóbine balaǵa «Kitap oqy» dep buıryq beremiz. Biraq bul — tıimsiz tásil. Qazir aqparat kóp, oqyǵan dúnıeni tez umytyp qalatyn zamanda ómir súrip jatyrmyz. Sondyqtan balany oqyǵanyn túsinýge, oı eleginen ótkizýge úıretý qajet, — dedi ol.

Al kitap oqýdy turaqty ádetke aınaldyrý úshin, eń aldymen, oǵan ýaqyt bólip, oqıtyn ádebıetti sanaly túrde tańdaǵan jón.

— Bıznes pen psıhologııaǵa arnalǵan kitaptardyń marketıngi óte jaqsy jolǵa qoıylǵan. Sondyqtan olar tez ótedi. Degenmen adam janyna áser etip, júrekke jetetin kórkem ádebıetten alystamaýymyz kerek. Onyń ústine qazir kitap oqýdy nasıhattaýǵa baǵyttalǵan birqatar joba qolǵa alynyp jatyr, — dedi Gúljaz Qarybek.

Aıta keteıik, elimizde «Kitap oqıtyn ult» respýblıkalyq marafony ótýde. Oǵan 1,4 mıllıonnan astam qazaqstandyq qatysyp jatyr.