Skrıpkashy Marat Bısenǵalıev elimizdiń mýzykalyq sımvoly atandy
ALMATY. Jeltoqsannyń 2-si. QazAqparat /Názıra Eleýhan/ - Tanymal qazaqstandyq skrıpkashy, dırıjer Marat Bısenǵalıev Táýelsizdiktiń alǵashqy on jyldyǵyndaǵy elimizdiń mýzykalyq sımvoly dep tanyldy.
Keshe Almatyda «Jyl tańdaýy - Altyn adam 2009» baıqaýy barysynda ataqty mýzykashyǵa osyndaı júlde tapsyryldy, dep habarlaıdy QazAqparat.
Marat Bısenǵalıev 1962 jyly Almaty qalasynda dúnıege kelgen. Ónerge 9 jasynan qadam basqan. 1980 jyly aldymen Qurmanǵazy atyndaǵy Almaty memlekettik konservatorııasyna túsip, odan keıin Máskeýde P.I.Chaıkovskıı atyndaǵy memlekettik konservatorııasynda bilim alyp shyqqan. Búginde ol Batys Qazaqstan oblystyq fılarmonııalyq orkestrge jetekshilik etedi, sonymen qatar ol Oraldyń halyqaralyq skrıpkashylar baıqaýynyń dırektory qyzmetin atqarady.
1996 jyly Nıý-Iorkte «Barbıkan Hollda» aǵylshyn kameralyq orkestrimen ótken kontsert onyń álemdik deńgeıdegi skrıpkashy retinde tanylýǵa yqpal etti. Ol iri halyqaralyq dybys jazý kompanııalarymen turaqty kelisimsharttarmen tyǵyz baılanys jasap turady. Marat Bısenǵalıev kóptegen halyqaralyq baıqaýlardyń laýreaty, sonymen qatar ol 2000 jyly «Platınalyq Tarlan» syılyǵynyń, buǵan deıin de «Jyl adamy» baıqaýynyń júldegeri atanǵan bolatyn.
Qazirgi ýaqytta Marat Bısenǵalıev álemdik turǵydaǵy kórnekti oryndaýshy retinde tanyldy, ony shet elderde «Qazaqstan áleminiń elshisi» dep ataıdy.
