Skrınshottyń paıdasy: jumys berýshiniń qysymynan qalaı qutylýǵa bolady
ASTANA. KAZINFORM — Memlekettik eńbek ınspektsııasy quqyǵy taptalǵan ár jumysshyǵa zańgerlik kómek kórsete alady. Bul týraly Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń Astana boıynsha departamentiniń basshysy Erlan Ismaǵulov málim etti.
— Eger jumys berýshi qyzmetkerden jumystan bosatý týraly ótinish jazýdy talap etse, Memlekettik eńbek ınspektsııasy osy qadamǵa barmaýǵa keńes beredi. Mundaı ótinish tek qyzmetkerdiń óz erkimen qabyldaǵan sheshimi negizinde ǵana berilýi tıis, — dedi Erlan Ismaǵulov elordanyń kommýnıkatsııalar qyzmetindegi baspasóz máslıhatynda.
Onyń sózine qaraǵanda, jumys berýshi telefon shalyp nemese WhatsApp habarlamalary arqyly qysym kórsetýdi jalǵastyrsa, qyzmetkerdi jumystan ketýge májbúrlese, onda osy jazbalardy saqtap, skrınshottaryn jasaý kerek. Bul óz kezeginde keıinnen sot isi úshin dáleldemelik baza qalyptastyrý maqsatynda qajet bolady.
— Quqyǵy buzylǵan qyzmetker Memlekettik eńbek ınspektsııasyna júgine alady. Memlekettik organ zańgerlik kómek kórsetedi, talap-aryz ázirleıdi, tıisti materıaldardy jınaqtaıdy jáne jumys berýshige qarsy sotqa talap-aryz berýge járdemdesedi, — dedi departament basshysy.
Buǵan deıin habarlanǵandaı, kompanııanyń ishki tártip erejesi boıynsha qyzmetker arnaıy kıim kııýge, ýaqytynda baılanysqa shyǵýǵa jáne klıenttermen sypaıy sóılesýge mindetti bolýy múmkin. Alaıda eńbek tártibin saqtamaǵan qyzmetkerge jumys berýshi kez kelgen jaǵdaıda aıyppul sala almaıdy.
