Skrınıngten jyl saıyn ne úshin ótý kerek
ASTANA. KAZINFORM – Densaýlyq saqtaý mınıstrligi qazaqstandyqtardy jyl saıyn skrınıngtik tekserýden ótýge shaqyrady, dep habarlaıdy vedomstvonyń baspasóz qyzmeti.
«Halyq densaýlyǵy jáne densaýlyq saqtaý júıesi týraly» Kodekstiń 80-babynyń 3-tarmaǵyna sáıkes, Qazaqstan azamattary profılaktıkalyq medıtsınalyq qarap-tekserýden jáne skrınıngtik zertteýlerden ótýge mindetti. Bıyldan bastap MÁMS júıesindegi mártebesine qaramastan, onkoskrınıngter barlyǵyna qoljetimdi.
Skrınıng júrek-qan tamyrlary aýrýlaryn, qant dıabetin, glaýkomany, sút bezi, jatyr moıny jáne ishek obyryn, V jáne S vırýstyq gepatıtterin, tserebrovaskýlıarlyq buzylýlardy jáne basqa da qaýipti patologııalardy erte anyqtaýǵa baǵyttalǵan. Jas sanaty men tekserý jıiligin dáriger medıtsınalyq standarttarǵa sáıkes belgileıdi.
Tekserýden ótý úshin emhanaǵa jeke kýálikpen barý jetkilikti. Sondaı-aq tirkelý, call-ortalyq nemese Damumed mobıldi qosymshasy arqyly jazylýǵa bolady. Kóp jaǵdaıda ýchaskelik dárigerler nemese meıirgerler jas jáne ózge de ólshemsharttar boıynsha tizim jasap, turǵyndardy ózderi shaqyrady.
Skrınıngten ótýge bolatyn negizgi sanattar:
-
Júrek-qan tamyrlary aýrýlary: 40-76 jastaǵy erler men áıelder;
-
Qant dıabeti: 40-76 jastaǵy erler men áıelder;
-
Glaýkoma: 40-76 jastaǵy erler men áıelder;
-
Sút bezi obyry: 40-76 jastaǵy áıelder;
-
Jatyr moıny obyry: 30-74 jastaǵy áıelder;
-
Kolorektaldyq obyr: 50-76 jastaǵy erler men áıelder;
-
V jáne S vırýstyq gepatıti: medıtsına qyzmetkerleri, operatsııa aldyndaǵy patsıentter, gemodıalız, onkologııa, transplantologııa, kardıohırýrgııa, pýlmonologııa ortalyqtarynyń patsıentteri, donorlar jáne júkti áıelder;
-
Tserebrovaskýlıarlyq buzylýlar: 50-76 jastaǵy er adamdar.
Mınıstrlik azamattarǵa tekserýden eshqandaı shaǵym nemese belgi bolmaǵan jaǵdaıda da ótýge keńes beredi. Bul densaýlyqqa senimdi bolýdyń jáne aýrýlardy erte anyqtaýdyń tıimdi joly sanalady.
Aıta keteıik, Úkimet Densaýlyq saqtaý mınıstrliginiń quzyretin keńeıtti.