Skrınıngten ótý: qazaqstandyq jumyskerler neni bilýi kerek
ASTANA. KAZINFORM — Qazaqstanda jumyskerler skrınıngtik zertteýlerden ótý úshin aqy tólenetin áleýmettik demalys alýǵa quqyly. Osyǵan baılanysty eńbek zańnamasynda kózdelgen kepildikter men jumys berýshilerdiń mindetteri týraly Astana qalasy boıynsha Eńbek ınspektsııasy departamenti basshysynyń mindetin atqarýshy Murat Shákenov málimdedi.
Onyń aıtýynsha, memleket azamattardyń profılaktıkalyq medıtsınalyq tekserýler men skrınıngtik zertteýlerden ýaqytyly ótýine qatysty birqatar sharalardy júzege asyryp keledi. Oǵan qosa ol Eńbek kodeksinde skrınıngtik zertteýlerden ótetin jumyskerler úshin qosymsha áleýmettik kepildikter kózdelgenin eske saldy.
— Eńbek kodeksiniń 23-baby 2-tarmaǵynyń 26-1) tarmaqshasyna sáıkes, jumys berýshi jumyskerge densaýlyq saqtaý salasyndaǵy zańnamada belgilengen tártippen skrınıngtik zertteýlerden ótý úshin jumys orny (laýazymy) men ortasha jalaqysy saqtalatyn demalys berýge mindetti, — dedi spıker Astana kommýnıkatsııalar qyzmeti alyńynda.
Sonymen qatar Eńbek kodeksiniń 87-babyna sáıkes, skrınıngtik zertteýlerden ótýge arnalǵan demalys áleýmettik demalys sanatyna jatady jáne jumyskerge kúntizbelik jyl ishinde úsh jumys kúninen aspaıtyn merzimge beriledi.
Murat Shákenovtiń málimetinshe, osy demalys kezeńi eńbek ótiline tolyq esepteledi, al demalys jumys berýshiniń tıisti aktisimen rásimdeledi. Skrınıngtik zertteýler tıisti nysanaly toptarǵa kiretin azamattar úshin tegin júrgiziledi.
— Jumys berýshiler jumyskerlerdiń mundaı tekserýlerden ótýine qajetti jaǵdaı jasap, olardy skrınıngten ótý kezeńinde ortasha jalaqysyn saqtaı otyryp jumystan kedergisiz bosatýǵa mindetti, — dep atap ótti ol.
Spıkerdiń aıtýynsha, is júzinde keıbir jumys berýshi qyzmetkerine mundaı demalysty berýden bas tartyp, tekserýden tek demalys kúnderi ótýdi talap etedi nemese jalaqysy saqtalmaıtyn demalys rásimdeýdi usynady.
— Mundaı áreketter eńbek zańnamasynyń talaptaryna qaıshy keledi jáne qyzmetkerdiń zańmen kepildendirilgen quqyqtaryn buzady, — dedi Murat Shákenov.
Vedomstvo ókili jumys berýshilerge jumyskerlerdi skrınıngtik zertteýlerden ótýge arnalǵan áleýmettik demalys alý quqyǵy týraly der kezinde habardar etýdi, ony rásimdeýdiń ishki tártibin bekitýdi, qajetti qujattamany ýaqtyly júrgizýdi jáne mundaı demalysty berýden negizsiz bas tartýǵa jol bermeýdi usyndy.
Eske salaıyq, buǵan deıin Qazaqstandaǵy skrınıng reformasy kimdi jáne qalaı qutqaratynyn jazǵanbyz.
