Skrınıng arqyly jańa týǵan náresteden tuqym qýatyn dertti anyqtaýǵa bolady – akýsher-gınekolog

ALMATY. QazAqparat - Sábı dúnıege kelgen soń, perzenthanada mindetti neonataldy skrınıngten ótedi. Mundaı skrınıng bizdiń elde ǵana emes, basqa elderde de júrgiziledi. Bul týraly №2 Almaty qalalyq perzenthananyń bas dárigeriniń orynbasary, akýsher-gınekolog Qymbat Abdraımova aıtty, dep habarlaıdy QazAqparat tilshisi.

Dárigerdiń sózinshe, skrınıngten ótý arqyly fenılketonýrııa, týa bitken gıpotıreoz, mýkovıstsıdoz sııaqty tuqym qýalaıtyn aýrýlardy anyqtaýǵa bolady.

«Neonataldy skrınıng arqyly tuqym qýalaıtyn, sırek kezdesetin úsh aýrýdy bolady. Bul óz kezeginde emdeýdi múmkindiginshe erterek bastaýǵa jáne aýrýdyń aýyr belgileriniń damýyna deıin qolaıly sátti jiberip almaýǵa múmkindik beredi. Jaqyn týystaryńyzdyń bul dertke shaldyqpaýy aýrýdyń buǵan deıingi ata-babalardan berilmeıtinin bildirmeıdi», - dedi Qymbat Abdraımova.

Onyń málimetinshe, fenılketonýrııa (FKÝ) - óte aýyr tuqym qýalaıtyn dert, onda amınqyshqyldary almasýynyń buzylýy dene jasýshalarynda jınalýyna ákeledi ári mıdyń zaqymdanýymen sıpattalady. Emdelmegen FKÝaqyl-oıdyń artta qalýyna, qurysýlarǵa, minez-qulyq problemalaryna jáne psıhıkalyq buzylýlarǵa ákelýi múmkin.

Týa bitken gıpotıreoz - eń jıi kezdesetin endokrındik patologııa, jańa týǵan nárestelerdegi aýrýshańdyq múmkindigi - 1:2000-1:4000. Bul aýrý aqyl-oı kemistiginiń negizgi sebebi bolyp tabylady.

Mýkovıstsıdoz - jasýshadaǵy hlorıd ıondarynyń arnasy qyzmetin atqaratyn aqýyz sıntezine jaýap beretin genniń ózgerýinen (mýtatsııadan) týyndaıtyn, tuqym qýalaıtyn aýrý. Bul arnanyń qyzmeti buzylǵandyqtan, ókpede, uıqy bezinde jáne basqa organdarda shyrysh jáne basqa da sekretsııalar óte qoıý jáne tutqyr bolady. Bul ókpe tinin zaqymdaıtyn ókpedegi sozylmaly ınfektsııanyń damýyna, as qorytýdyń buzylýyna ákeledi, óıtkeni uıqy beziniń fermentteri ishekke kire almaıdy jáne basqa da klınıkalyq kórinister oryn alady.