Skrınıng ádisimen jasalatyn dárigerlik tekseristiń sapasy artpaq
ASTANA. 15 naýryz. QazAqparat /Aınur Kenebaeva/ - Astanada QR Densaýlyq saqtaý mınıstrligi jáne Salaýatty ómir saltyn qalyptastyrý problemalary ulttyq ortalyǵynyń bastamasymen «Áleýmettik mańyzdy aýrýlardy erte satyda anyqtaý boıynsha skrınıngti qaralýdy tıimdi ótkizý» atty respýblıkalyq semınar ótip jatyr.
2 kúndik semınar barysynda birneshe mańyzdy máselerdi taldaý qarastyrylǵan. Birinshiden, halyq densaýlyǵyn aldyn ala tekserý men onyń tıimdiligin arttyrýdyń halyqaralyq tájirıbeleri, ekinshiden, balalar men eresekter arasynda aýrýdy erte satyda skrınıng ádisimen anyqtaýdyń ulttyq baǵdarlamasyn engizý, úshinshiden áleýmettik mańyzdy aýrýlarmen kúres jáne salaýatty ómir saltyn qalyptastyrýdyń tıimdi joldaryn izdestirý máseleleri jan-jaqty talqylanbaq.
«Bizdiń maqsatymyz - bir ǵana salaǵa, ıaǵnı tek qana skrınıng ádisimen tekseris ótkizýge baǵyttalǵan arnaıy mamandary bar aýrýdyń aldyn alý men medıtsınalyq-áleýmettik kómek bólimshelerin kóptep ashý»,-dep, qolǵa alynǵan sharanyń qoǵamdyq mańyzyn aıryqsha atap ótti Salaýatty ómir saltyn qalyptastyrý problemalary ulttyq ortalyǵynyń bas dırektory Sáýle Dıqanbaeva jýrnalısterge bergen suhbatynda.
Sáýle Dıqanbaevanyń sózine súıensek, qazirgi tańda jatyr men sút bezi qaterli isigi dertteri, qan aınalym júıesi aýrýlary men týberkýlezdi erte satyda skrınıng ádisimen anyqtaý memleket tarapynan tolyqqandy qarjylandyrylyp jatyr.
Dárigerlik ambýlatorılıalarda, aýdandyq, qalalyq aýrýhanalardyń barlyǵynda derlik áleýmettik aýrýlardyń aldyn alý men medıtsınalyq-áleýmettik kómek kórsetý bólimshelerin ashý qolǵa alynyp otyr.
Jyl saıyn 2,5 mıllıonnan astam áıel adam jatyr men sút bezi qaterli isigin erte satyda anyqtaý boıynsha tekseristen ótedi. Bul, Sáýle Dıqanbaevanyń pikirinshe, ýchaskelik dárigerge úlken eńbek aýyrtpalyǵyn túsiredi.
«Skrınıng ádisimen tekseris ótkizýge baǵyttalǵan aýrýdyń aldyn alý men medıtsınalyq-áleýmettik kómek bólimshelerin ashý eń aldymen ýchaskelik dárigerge júktelgen eńbek aýyrtpalyǵyn tómendetedi, halyqqa kórsetiletin medıtsınalyq kómek pen aýrýdyń aldyn alý tekserisiniń sapasyn arttyrady», - dedi Sáýle Dıqanbaeva óz sózinde.
Rýspýblıkalyq semınarǵa kardıologııa, onkologııa, radıologııa, kóz aýrýlary respýblıkalyq ǵylymı-zertteý ortalyqtarynyń ókilderi men Qazaqstannyń túrli aımaqtarynan kelgen alǵashqy medıtsıanalyq kómek kórsetý mamandary qatysty.
