Skott Mýnn Qazaqstan fýtbol federatsııasy bas hatshysy qyzmetine usynyldy
ASTANA.KAZINFORM - Qazaqstan fýtbol federatsııasy Jarǵysynyń 127-tarmaǵyna sáıkes, QFF Prezıdenti Marat Omarov Skott Mýnnnyń kandıdatýrasyn QFF Atqarýshy komıtetiniń qaraýyna jáne bas hatshy qyzmetine taǵaıyndaý úshin bekitýge usyndy.
Skott Mýnn — Anglııa Premer-lıgasynda jáne Eýropa, Azııa men Aýstralııanyń jetekshi fýtbol naryqtarynda 20 jyldan astam tájirıbesi bar álemdegi bedeldi fýtbol menedjerleriniń biri.
2023–2025 jyldary ol Tottenham Hotspur klýbynda fýtbol jónindegi dırektor qyzmetin atqaryp, akademııany, erler jáne áıelder komandalaryn qosa alǵanda, klýbtyń fýtbol qyzmetine basshylyq jasady. Onyń jetekshiligimen klýb 2024/25 maýsymynda ÝEFA Eýropa lıgasynyń jeńimpazy atanyp, Karabao kýbogynyń jartylaı fınalyna jetti.
Tottenham Hotspur klýbyna kelgenge deıin Skott Mýnn Qytaıdaǵy City Football Group kompanııasynyń bas dırektory jáne «Sychýan Tszıýnnıý» fýtbol klýbynyń dırektorlar keńesiniń tóraǵasy bolǵan. Ol Qytaı fýtbol qaýymdastyǵyn reformalaý jónindegi jumys tobyna qatysqan jalǵyz batystyq ókil bolyp, qyzmeti barysynda klýbtyń eldegi eń iri demeýshilik portfelin qalyptastyrýǵa úles qosty.
Buǵan deıin Skott Mýnn Melbourne City FC klýbynyń alǵashqy bas dırektory boldy. Ol klýbtyń irgetasyn qalap, 100 qyzmetker men oıynshydan turatyn ujym jasaqtady. Etihad Airways, Nike jáne Westpac sııaqty demeýshilerdi tartyp, quny 20 mıllıon dollar bolatyn jattyǵý bazasynyń qurylysyn qamtamasyz etti. Sondaı-aq klýb músheleriniń sanyn 13 500 adamǵa deıin jetkizdi. Onyń basshylyǵymen klýb tórt maýsym qatarynan A-lıganyń pleı-off kezeńine shyǵyp, FFA kýbogyn jeńip aldy jáne áıelder arasyndaǵy W-League chempıonatynda úsh ret qatarynan chempıon atandy. Sonymen qatar ol klýbtyń City Football Group quramyna kirýi boıynsha strategııalyq mámileni uıymdastyrdy.
Atalǵan kandıdatýra bekitilgen jaǵdaıda, Qazaqstan fýtboly tarıhyndaǵy halyqaralyq deńgeıi joǵary basshynyń taǵaıyndalýy bolmaq. Bul QFF-nyń álemniń jetekshi fýtbol federatsııalarynyń standarttaryna saı bolýǵa umtylysyn kórsetedi.
Federatsııa málimeti boıynsha, kandıdatýra belgilengen tártipke sáıkes Atqarýshy komıtettiń aldaǵy otyrysynda qaralatyn bolady.
Aıta keteıik, «Ertis» fýtbol klýbyna jańa dırektor taǵaıyndaldy.
