Skorıngsiz ıpotekany qalaı alýǵa bolady
ASTANA. KAZINFORM - Ortasha tabysy bar, iri jınaǵy joq azamattar úı alýǵa qalaı aqsha jınaıdy? Ipoteka alý úderisin qalaı jeńildetýge bolady? Bul týraly Otbasy bankiniń basqarma tóraǵasy Lázzat Ibragımova BIZDIÑ ORTA podkastynda aıtty.
Lázzat Ibragımovanyń aıtýynsha, klıenttiń tólem qabilettiligi skorıng júıesi arqyly baǵalanady. Bul júıe kredıttik tártipti, qaryzdardy ýaqytynda óteý deńgeıin jáne ózge de birqatar kórsetkishterdi eskeredi.
Sarapshynyń túsindirýinshe, tipti turmystyq tehnıkany bólip tóleý kezinde bolǵan shaǵyn keshiktirýlerdiń ózi skorıng balyna áser etedi. Al sońǵy birneshe aıdaǵy ótelmegen bereshek reıtıngti aıtarlyqtaı tómendetedi.
Onyń sózinshe, banktiń negizgi mindeti – klıenttiń qarjylyq beınesin durys anyqtaý. Sonymen birge ol kiris deńgeıi men skorıngti jaqsartýǵa baılanysty belgili bir tıimdi tásilder bar ekenin de atap ótti.
— Eger azamattar júıege qatysyp, 3 jyldan astam ýaqyt boıy turaqty túrde jınaq jasasa jáne 16 baǵalaý kórsetkishine jetse, onda olarǵa skorıngten ótýdiń qajeti bolmaıdy, – dep túsindirdi Lázzat Ibragımova.
Mysaly, azamattar quny 30 mln teńge bolatyn páter satyp alýdy josparlady delik. Bul jaǵdaıda bastapqy jarna retinde 15 mln teńge jınaý qajet. Osy tusta Lázzat Ibragımova jınaqtaý merzimin aldyn ala naqty josparlaý mańyzdy ekenin aıtty. Máselen, 48 aılyq merzimdi tańdap, qajetti somany aı saıyn teń bólip jınaý arqyly maqsatqa qol jetkizýge bolady.
— Eger azamattar 36 aılyq jınaqtaý tártibin saqtasa, sondaı-aq tıisti syıaqy men baǵalaý kórsetkishine jetse, onda olar páterdi tek jumys ornyn rastaıtyn anyqtama arqyly ala alady. Bul jaǵdaıda klassıkalyq skorıngten ótýdiń qajeti bolmaıdy, – dedi Lázzat Ibragımova.
Onyń aıtýynsha, baǵdarlamaǵa negizinen 35 jasqa deıingi jastar qatysady. Olardyń qatarynda qalada eńbek etetinder, aýyldan qonys aýdarǵandar jáne alǵashqy baspanasyn alýdy kózdeıtin azamattar bar.
— Bul – otbasyn qurýdy josparlap, alǵashqy páterin satyp alatyn azamattar. Ótken jyly osy baǵdarlama aıasynda shamamen 18 myń qaryz berildi, – dedi Lázzat Ibragımova.
Bıyl baspana alý konkýrstary 30 naýryzǵa deıin ótken. Onyń qorytyndysy boıynsha 16 myń jeńimpaz anyqtalǵan eken. Qazirgi ýaqytta qatysýshylar baspana izdep, tólem qabilettiligin baǵalaý rásiminen ótip jatyr. Banktiń boljamyna sáıkes, 16 myń jeńimpazdyń shamamen 10 myńy ǵana nesıe ala alady.
Lázzat Ibragımovanyń pikirinshe, qazaqstandyqtar sońǵy ýaqytta qarjylyq esep-qısapqa jáne óz múmkindigin durys baǵalaýǵa kóbirek mán bere bastaǵan.
Aıta keteıik, jyl saıyn paıdalanýǵa beriletin turǵyn úı kólemi 20 mln sharshy metrge jetti.
