SQO joldarynda jyl basynan beri 3 bala zardap shekti
PETROPAVL. QazAqparat – Soltústik Qazaqstan oblysynda polıtseıler kóktemgi demalys qarsańynda mektep oqýshylarymen kezdesip, jolda júrý erejelerin pysyqtady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jyl basynan óńir joldarynda úsh bala zardap shekti. Oqys oqıǵalar qaıtalanbaýy úshin demalys qarsańynda polıtseıler mektep oqýshylarymen kezdesti. Synyp saǵatynyń taqyryby - joldaǵy qaýipsizdik. Bul taqyryp qashanda ózekti. Tártip saqshylarynyń aıtýynsha, joldaǵy qozǵalysty retteıtin polıtseıdiń qımyldaryn tipti eresekterdiń ózderi de bile bilmeıdi.
ıÝ.Gagarın atyndaǵy № 14 orta mektepte jergilikti polıtsııa qyzmetiniń ınspektory Marat Temirbekov tórtinshi synyp oqýshylaryna taıaqshanyń ár pozıtsııasy neni bildiretinin egjeı-tegjeıli túsindirip berdi. Balalar synypta ózderin retteýshi rólinde synap kórdi.
«Erejelerdi qaıtaladyq. Joldy tek baǵdarshamnyń jasyl túsi janǵanda, jan-jaqqa qarap, qaýipsizdikke kóz jetkizgennen keıin ǵana ótý qajettigin eske saldym. Qazir jıi kezdesetin másele – kóshede qulaqqap taǵyp alyp júrý. Bul óte qaýipti. «Zebraǵa» jaqyndaǵanda da, jaqyn mańda mashınanyń joqtyǵyn kórip nemese ol toqtaǵan kezde ǵana ótken durys», - deıdi Marat Temirbekov.
Al «Ońtústik» baqylaý-ótkizý beketinde tártip saqshylary júrgizýshilerge profılaktıkalyq býkletter men jadynamalar taratty. Basty usynys - jaıaý júrginshiler ótkeli janynda jyldamdyqty azaıtý, balany tek arnaıy arbada tasymaldaý.
Jyl basynan jaıaý júrginshilerdiń kinásinen SQO-da 3 jol-kólik oqıǵasy tirkelip, 1 adam qaıtys boldy, 2 adam jaraqat aldy.
