SQO joldarynda qańtar aıynan 6 adam qaza taýyp, 20-sy jaraqattandy
PETROPAVL. QazAqparat – Soltústik Qazaqstan oblysynda jyl basynan jol júrisi qaǵıdalaryn buzýdyń 3 myńǵa jýyq deregi tirkeldi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 31 qańtar saǵat 17.30 shamasynda Petropavldaǵy ıA.Gashek kóshesinde polıtseıler «Lada» avtokóligin toqtatty. Kólik tizgininde 38 jastaǵy qala turǵyny bolǵan. Tekseris barysynda er adamnyń buryn kólik basqarý quqyǵynan aıyrylǵany belgili boldy, buǵan qaramastan ol kólikti basqarýdy jalǵastyryp kelgen. Oǵan qatysty QR ÁQBtK-niń 612-babynyń 3-bóligi «Qujattary joq jáne basqarý quqyǵy joq adamnyń kólik quralyn basqarýy» boıynsha ákimshilik quqyq buzýshylyq týraly hattama jasaldy. Ákimshilik materıal protsessýaldyq sheshim qabyldaý úshin sotqa jiberildi.
Jalpy, qańtar aıynyń basynan oblysta jol júrisi qaǵıdalaryn buzýdyń 2687 deregi anyqtaldy. 346 júrgizýshi jyldamdyqty asyrǵan, 277 adam qaýipsizdik beldigin paıdalanbaǵan. Kólikti alkogoldik nemese esirtkilik mas kúıde júrgizgeni úshin 51 avtokólik ıesine aıyppul salyndy. Kólik júrgizý kezinde 120 júrgizýshi telefonmen sóılesken, 215 júrginshi joldy belgilenbegen jerden kesip ótip, jol júrisi qaǵıdalaryn buzǵan.
«Petropavl qalalyq polıtsııa basqarmasy patrýldik polıtsııa batalonynyń qyzmetkerleri 19 qańtardan bastap oblysta ótkizilip jatqan «Quqyqtyq tártip» jedel-profılaktıkalyq is-sharasy aıasynda jumys istep jatyr. Jol qozǵalysynyń barlyq qatysýshylaryn jol ústinde saq bolýǵa bolýǵa jáne jol júrisi qaǵıdalaryn qatań saqtaýǵa shaqyramyz. Qańtar aıynyń basynan SQO-da 15 jol-kólik oqıǵasy tirkelip, saldarynan 6 adam qaza taýyp, 20 adam jaraqat aldy», – deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
