SQO joldarynda balalar japa shekken 7 jol-kólik oqıǵasy tirkeldi
PETROPAVL. QazAqparat – Soltústik Qazaqstan oblysynda bıyl balalar japa shekken 7 jol-kólik oqıǵasy tirkeldi, saldarynan 8 adam jaraqat aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jergilikti polıtsııa qyzmeti basqarmasynyń qyzmetkerleri Facebook jáne Instagram-daǵy vedomstvolyq akkaýnttarynda onlaın-brıfıng uıymdastyryp, balalardyń qatysýymen bolatyn jol-kólik oqıǵalarynyń aldyn alýdy maqsat etti. Bul taqyryp kún jylysymen ásirese ózekti. Óıtkeni balalar bos ýaqyttarynyń kóbin kóshede ótkizedi.
Polıtsııanyń aǵa ınspektory Azamat Jamuqovtyń aıtýynsha, osy jyldyń úsh aıynda oblys joldarynda balalar japa shekken 7 jol-kólik oqıǵasy tirkeldi. Saldarynan 8 adam jaraqattandy. Osyǵan oraı jazǵy demalys qarsańynda polıtseıler ata-analardy jáne pedagogterdi balalarmen áńgime júrgizýge shaqyrady. Tártip saqshylary ózderi de synyp saǵattaryn ótkizip, mekteptegi taqyryptyq stendterdi nazardan tys qaldyrmaıdy. «Jol qozǵalysynyń jas ınspektory» jasaǵynyń jumysyna jetekshilik júrgizedi. Aıta ketetini, oblysta 280 astam osyndaı jasaq jumys isteıdi, bundaı jasaqtardyń quramynda 4310 oqýshy bar.
Áleýmettik jelilerdiń qoldanýshylary kókeılerindegi suraqtaryn qoıdy: velosıped tepken kezde kaska men tizeqapty kııý mindetti me, túrli kólik markalaryna balalar kreslosyn qalaı ornatý qajet, jol belgileriniń salynýy.
Sondaı-aq, onlaın-brıfıng barysynda PD Shtaby bastyǵynyń orynbasary Sergeı Pogosskıı vedomstvonyń ótken aptadaǵy jedel-qyzmettik jumysyn qorytyndylady. 212 qylmystyq quqyq buzýshylyq tirkelgen. Qylmysty ashý deńgeıi 86 % quraǵan. Oblys joldarynda 3 jol-kólik oqıǵasy tirkelgen, saldarynan 3 adam jaraqattandy. Jol qozǵalysy erejeleriniń 1880 buzýshylyǵy anyqtalǵan, onyń 99-y belgilengen jyldamdyqty asyrý. Bir apta ishinde kólikti mas kúıde tizgindegen 13 adam ustaldy.
