SQO joldarynda 420 mas júrgizýshi ustaldy
PETROPAVL. QazAqparat - Soltústik Qazaqstan oblysynda balalardyń jazǵy demalysy bastalysymen polıtseıler de profılaktıkalyq reıdterdi kóbeıtti, dep habarlaıdy QazAqparat tilshisi.
Maqsat - balalardyń qatysýymen bolatyn jol-kólik oqıǵalarynyń aldyn alý. SQO Polıtsııa departamenti baspasóz qyzmetiniń habarlaýynsha, táýlik saıyn qoǵamdyq tártipti saqtaýǵa jáne jol qaýipsizdigin qamtamasyz etýge Petropavl qalasy boıynsha - 23, oblys boıynsha - 36 avtopatrýl kezekshilikke túsedi.
«Jol-kólik oqıǵalarynyń negizgi sebepteri - manevr jasaý erejelerin buzý, joldyń qarsy qozǵalys bóligine shyǵý, jaıaý júrginshilerdiń jol qozǵalysy erejelerin buzýy. Jol qozǵalysy erejeleriniń óreskel buzýshylyqtaryn boldyrmaý maqsatynda jyl basynan oblys joldarynda 5 jedel-profılaktıkalyq is-shara ótkizildi.
Nátıjesinde 29 myńnan astam ákimshilik quqyq buzýshylyq anyqtaldy. Onyń ishinde 420-sy mas kúıde kólik quralyn júrgizý faktileri. Oblys ortalyǵynda 118 mas júrgizýshi ustaldy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
SQO PD Jergilikti polıtsııa qyzmeti basqarmasynyń aqparaty boıynsha, jyl basynan balalardyń jol-kólik travmatızmi boıynsha 13 jol-kólik oqıǵasy tirkelgen, odan 13 bala zardap shegip, 1 bala qaza tapty. Jalpy, osy jyldyń tórt aıynda oblys boıynsha 61 jol-kólik oqıǵasy tirkelip, nátıjesinde 7 adam kóz jumdy, 74 adam jaraqat aldy.
SQO Polıtsııa departamentiniń bastyǵy Marat Tólebaev jol apatyn boldyrmaý maqsatynda jergilikti polıtsııa bólinisteriniń qyzmetkerlerin Jol qozǵalysy erejeleriniń óreskel buzýshylyqtaryn anyqtaý boıynsha turaqty reıdter ótkizýge baǵyttady. Sondaı-aq, jazǵy mektep demalysynyń bastalýyna baılanysty polıtseıler ata-analardy balalarymen Jol qozǵalysy erejelerin qatań saqtaý qajetigi týraly áńgimelesýge jáne úıretýge shaqyrady.
