SQO joldaryn kútip ustaýǵa 8 mlrd teńgege jýyq qarajat bólindi
PETROPAVL. QazAqparat – Soltústik Qazaqstan oblysyndaǵy jergilikti mańyzy bar joldardy jóndep, kútip ustaýǵa bıyl 7,8 mlrd teńge bólindi, dep habarlaıdy QazAqparat tilshisi.
SQO jolaýshylar kóligi jáne avtomobılder joldary basqarmasynyń málimetinshe, byltyr óńirdegi jergilikti mańyzy bar joldardy jóndep, qalypty ustaýǵa 26,9 mlrd teńge bólindi.
Onyń 9,3 mlrd teńgesi jergilikti bıýdjetten baǵyttaldy. Budan basqa respýblıkalyq joldardy jóndeýge 8,6 mlrd teńge berildi.
«35,5 mlrd teńge berilse, bul qarajatqa respýblıkalyq mańyzy bar 100 km, 11,2 mlrd teńgege oblystyq mańyzy bar 240 km, 7,2 mlrd teńgege aýdandyq mańyzy bar 259 km, «Aýyl – El besigi» jáne «Jumyspen qamtýdyń jol kartasy» baǵdarlamalary aıasynda 8,5 mlrd teńgege eldi mekenderdiń kósheleri jóndeldi. Nátıjesinde 117 myń turǵyny bar 150 eldi mekenniń jol jaǵdaıy túzeldi. Osylaısha, jaǵdaıy jaqsy oblystyq mańyzy bar joldar 69 %-dy qurady», - deıdi SQO jolaýshylar kóligi jáne avtomobılder joldary basqarmasy basshysynyń orynbasary Maqsat Baıahmet.
Bıyl jergilikti mańyzy bar joldardy jóndep, kútip ustaýǵa bıýdjetten 7,8 mlrd teńge bólingen.
Jalpy SQO-da respýblıkalyq mańyzy bar – 1970 km, oblystyq – 1983 km jáne aýdandyq mańyzy bar – 5043 shaqyrym bar.
«Jóndelgen joldardyń sapasy baqylaýda boldy. «Jol aktıvteriniń ulttyq sapa ortalyǵy» RMK fılıalymen kelisimge otyrdyq. Olar keste boıynsha jóndelip jatqan nysandarǵa baryp, tekserip otyrdy. Budan basqa «Sapaly jol» jobasy bar. Avtomobıl joldarynyń jaǵdaıyna monıtorıng júrgizedi. Qoǵam ókilderi, sybaılas jemqorlyqqa qarsy qyzmet, «Nur-Otan» partııasynyń músheleri, BAQ ókilderi kirgen arnaıy monıtorıngtik top jumys isteıdi», - deıdi Maqsat Baıahmet.
Byltyr basqarma jasalǵan mámileni jaramsyz etip, qarajatty qaıtaryp alýǵa jáne JShS-ni memlekettik satyp alýdyń alaqol qatysýshysy dep taný maqsatynda «TOIR» JShS qatysty sotqa eki talap aryz joldady.
Alaıda bul eki aryzdy da sot qaıtaryp jiberdi.
