SQO joldarynyń sapasy tekserildi: synamalardyń tórtten biri talapqa saı emes
PETROPAVL. KAZINFORM – Soltústik Qazaqstan oblysynda bıylǵy jol-qurylys maýsymynda joldardyń sapasyna keń kólemdi tekserý júrgizildi. Nátıjesinde kóptegen kemshilik anyqtalyp, birqataryn merdigerler joıýǵa kiristi.
Jyl basynan beri óńirde barlyǵy 128 jol nysany tekserilip, 366 ret ınspektsııa jasaldy. Sonyń nátıjesinde 259 túrli aqaý men zańbuzýshylyq tirkeldi. Onyń 135-i qazirdiń ózinde túzetildi, qalǵandary boıynsha jumys júrip jatyr. Jalpy 1847 synamanyń 27% standarttarǵa sáıkes kelmegen.
Oblystyq mańyzy bar joldardan alynǵan synamalardyń úshten biri sapasyz bolyp shyqty. Kóbine asfalttyń quramyndaǵy tyǵyzdyq, beriktik jáne sýdy sińirý kórsetkishteri talapqa saı bolmaǵan.
Aýdandyq joldarda jaǵdaı budan da nashar: alynǵan synamalardyń jartysynan astamy sapasyz ekeni belgili boldy. Asfalttaǵy oıyqtar men jaryqtar, tegistiktiń saqtalmaýy, materıaldardyń quramyndaǵy sáıkessizdikter – negizgi máselelerdiń biri.
Eldi meken kósheleri boıynsha 53 nysan qamtylyp, tekserilgen materıaldardyń 59% talapqa saı bolmaı shyqty. Munda da asfalt sapasy, ınertti materıaldar jáne bıtým boıynsha eleýli kemshilikter bar.
Respýblıkalyq mańyzy bar joldarda jaǵdaı salystyrmaly túrde jaqsyraq. Munda alynǵan synamalardyń 20% ǵana sapasyz dep tanyldy. 234 aqaýdyń jartysyna jýyǵy túzetildi, qalǵandary bıylǵy jol-qurylys maýsymy aıaqtalǵansha retke keltirilmek.
Jalpy bıyl respýblıkalyq joldardyń 1035 km dıagnostıka júrgizilip, 177 km joldyń tegistigi talapqa saı emes ekeni, 80 km jol jabyndysynyń ilinisý koeffıtsıenti tómen ekeni belgili boldy.
Mamandardyń aıtýynsha, mundaı tekserýdiń maqsaty – joldaǵy kemshilikterdi der kezinde anyqtap, sapasyz jumystyń aldyn alý. Jospar boıynsha bıyl oblysta 1481 shaqyrym jol dıagnostıkadan ótedi.
Buǵan deıin Qazaqstanda avtomobıl joldaryn baqylaý úshin SRDS (Smart Roads Diagnostics System) júıesi engizilgenin jazǵan edik.