SQO joldarynda jyl basynan 28 adam mert boldy
PETROPAVL. KAZINFORM — Soltústik Qazaqstan oblysynda ıntellektýaldy beınekameralardyń kómegimen jyl basynan 77 myńnan astam jol qozǵalysy erejesin buzý deregi tirkeldi.
SQO Polıtsııa departamenti baspasóz qyzmetiniń málimetinshe, qazir oblys aýmaǵynda polıtsııanyń avtomattandyrylǵan 67 apparattyq-baǵdarlamalyq kesheni jumys isteıdi. Maqsat — aıyppul salý emes, adamdardyń ómiri men densaýlyǵyn qorǵaý. Beınekameralar jyldamdyqty asyrǵandy, qarsy jolaqqa shyqqandy, baǵdarshamnyń tyıym salynǵan sıgnalyna ótip ketkendi tirkeıdi. Bulardyń barlyǵy jol apattarynyń keń taralǵan sebepteri.
«Aqyldy» kameralar respýblıkalyq mańyzy bar tasjoldarǵa, sondaı-aq Petropavl qalasyndaǵy mektepterdiń, stadıondardyń janyna, jol-kólik oqıǵasy jıi tirkeletin qaýipti aımaqtarǵa ornatylǵan.
Jalpy jyl basynan beri SQO-da 362 jol-kólik oqıǵasy tirkelip, 28 adam mert boldy, 488 adam jaraqattandy. Al keshender ornatylǵan jerlerde aýyr saldary bar birde-bir apat tirkelmegen.
Esterińizge salaıyq, 1 qyrkúıek kúni jeńil kólik qarsy baǵytqa shyǵyp ketip, saldarynan 2 adam mert boldy, beseýi aýyr jaraqattandy.
Al Oralda polıtseıden qashqan turǵyn jol apatyn jasap, júrgizýshini mert qylǵanyn jazdyq.