SQO joldarynda bıyl velosıped-moped mingen 4 bala mert boldy
PETROPAVL. KAZINFORM - Soltústik Qazaqstan oblysynda bolǵan 40 jol-kólik oqıǵasynda 4 kámeletke tolmaǵan bala kóz jumyp, 45-i jaraqat aldy.
Oblystyq polıtsııa departamentiniń málimetinshe, mert bolǵan balalardyń bireýi velosıped, qalǵan úsheýi moped tizgindegen. Osyǵan baılanysty polıtseıler jazǵy demalys kezinde balalardyń jol qaýipsizdigine erekshe kóńil bólip otyr.
Tártip saqshylary Velosporttan olımpıadalyq rezervtiń mamandandyrylǵan balalar men jasóspirimder sport mektebimen birlesip Petropavlda velosherý uıymdastyrdy. Іs-sharaǵa elýge jýyq jas sportshy qatysty.
- Jol qozǵalysy erejesin saqtańyzdar – ol sizdiń ómirińizdi saqtaıdy!» uranymen ótken velosherý barysynda qatysýshylar Qazaqstan Konstıtýtsııasy kóshesi boıymen júrip ótti. Sherý kezinde balalar júrginshiler ótkelderinen velosıpedterinen túsip, jaıaý ótti. Polıtseıler munyń sebebin túsindirdi: velosıpedshi joldyń júrý bóliginde kenetten paıda bolǵan jaǵdaıda júrgizýshiler der kezinde áreket ete almaýy múmkin.
Іs-shara barysynda tártip saqshylary velosıped, skýter jáne elektrsamokat paıdalanýshylar jıi tap bolatyn qaýipterdiń biri - aýyr júk kólikteriniń «kórinbeıtin aımaqtary» týraly da eskertti. Patrýldik polıtsııa qyzmetkerleri balalarǵa «KamAZ» júk kóliginiń mysalynda júrgizýshiniń qaı tustarda velosıpedshini nemese jaıaý júrginshini baıqamaı qalýy múmkin ekenin kórsetti.
Mamandardyń aıtýynsha, eger velosıpedshi júrgizýshini júk kóliginiń aınasynan kórmese, onda júrgizýshi de ony kórmeıdi.
Polıtseıler bul velosherýdi «Joldaǵy balalar» jedel-profılaktıkalyq is-sharasy aıasynda uıymdastyrdy.
Bqǵan deıin Shymkentte bala 12 metrlik qudyqqa qulap ketkenin jazǵan edik.
