SQO joldarynda «aqyldy kameralar» iske qosyldy
PETROPAVL. KAZINFORM – Soltústik Qazaqstan oblysynyń joldarynda búginnen bastap «aqyldy kameralar» sany artty. Jol júrisi qaǵıdalaryn buzýdy avtomatty túrde tirkeıtin qurylǵylar sany óńirde osylaısha 50-den asyp otyr.
SQO Polıtsııa departamenti baspasóz qyzmetiniń málimetinshe, oblysta osy ýaqytqa deıin 2022 jyly ornatylǵan 30 qurylǵy jumys istedi. Olar ornatylǵan ýchaskelerde adamdar zardap shekken birde-bir jol-kólik oqıǵasy tirkelmedi.
«Osy jyldyń segiz aıynda bul qurylǵylar ótken jyldyń osy kezeńimen salystyrǵanda eki ese az zań buzýshylyqty tirkegen, budan osy qurylǵylardyń júrgizýshilerdi tártipke keltirgenin baıqaýǵa bolady. Oblysta qańtar aıynan beri 297 jol-kólik oqıǵasy tirkeldi. Saldarynan 23 adam qaza taýyp, 405 adam jaraqat aldy. Búgingi tańda apattylyqty azaıtý – polıtsııanyń mańyzdy mindetteriniń biri», - deıdi SQO PD ákimshilik polıtsııa basqarmasynyń bastyǵy Serik Áljanov.
Apparattyq-baǵdarlamalyq keshenderdiń tıimdiligin jáne azamattardyń ótinishterin eskere otyryp, oblystyq polıtsııa departamenti taǵy 24 qurylǵy aldy. Olar qozǵalysy kóp ýchaskelerge ornatylǵan. Taǵy 2 keshen temir jol ótpesindegi, 3 keshen jaıaý júrginshiler ótkelindegi zań buzýshylyqtardy tirkeıdi, al 4 keshen patrýldik avtokólikterge ornatylǵan.
Budan bólek, Petropavl qalasy syrtyndaǵy joldardyń qaýipti ýchaskelerinde «Kordon.Pro» M apparattyq-baǵdarlamalyq mobıldi keshenderi jumys isteı bastady. Bul qurylǵylar jyldamdyqty asyrý, qaýipsizdik beldigin taqpaý, kólik basqarý kezinde uıaly telefondy paıdalaný, jol tańbalaryn elemeý sekildi zań buzýshylyqtardy tirkeıdi.
Buǵan deıin bir top jasóspirim oqýshyny soqqyǵa jyǵyp, ony vıdeoǵa túsirgenin jazǵan edik.
