SQO joldarynda «aqyldy» beınekameralar sany artty

PETROPAVL. KAZINFORM – Soltústik Qazaqstan oblysynyń joldarynda 70-ten astam ıntellektýaldy beınebaqylaý kameralary jumys istep tur.

SQO Polıtsııa departamenti baspasóz qyzmetiniń málimetinshe, júrgizilip jatqan jumystyń maqsaty – óńir joldaryndaǵy apattar sanyn azaıtý. Jyl basynan beri oblys aýmaǵynda 184 jol-kólik oqıǵasy tirkelip, 7 adam mert boldy, 256 adam jaraqat aldy.

- Jol erejesin buzýdy avtomatty túrde foto jáne beıne tirkeý júıeleri óz tıimdiligin kórsetip otyr. «Aqyldy» beınekameralar ornatylǵan joldarda aýyr zardaby bar birde-bir jol-kólik oqıǵasy tirkelmegen. Apattylyqty taldaý men azamattardyń ótinishterine súıene otyryp, bul júıelerdi qala mańyndaǵy joldarǵa da engizý jumystaryn jalǵastyryp jatyrmyz, - deıdi tártip saqshylary.

Búginde SQO-da 67 «ıntellektýaldy» beınebaqylaý apparattyq-baǵdarlamalyq kesheni jumys isteıdi. 10 maýsymnan bastap qozǵalys qarqyny joǵary Qyzyljar aýdanynyń shetki aımaqtarynda taǵy 5 jańa qurylǵy iske qosyldy. Olar «Jezqazǵan-Petropavl» trassasyndaǵy Beskól men Báıterek aýyldarynyń negizgi kireberisterinde, «Astana-Petropavl» jolyndaǵy «Altiro» kafesiniń mańynda jáne «Chelıabi-Novosibir» trassasyndaǵy Beloe aýylynyń negizgi kireberisinde ornatylǵan.

Budan bólek, «QazAvtoJol» UK» AQ «Aqyly avtomobıl joldary dırektsııasy» fılıaly «Kókshetaý-Petropavl» avtojolynda Beskól, Astrahanka jáne Dragomırovka aýyldarynyń mańynda jyldamdyqty avtomatty ólsheý quraldaryn ornatty.

Buǵan deıin SQO-da salynyp jatqan keı joldar standartqa saı bolmaǵanyn jazǵan edik.