SQO: Jol jıegindegi qyzmet kórsetetin nysandardyń 70%-y standartqa saı emes
PETROPAVL. QazAqparat - «Qazavtojol» UK» AQ Soltústik Qazaqstan oblystyq fılıalynyń dırektory Bolatbek Aıtbaev respýblıkalyq mańyzy bar joldardyń boıyndaǵy qyzmet kórsetetin nysandardyń ahýaly jaıly aıtty, dep habarlaıdy QazAqparat tilshisi.
Oblystyq jolaýshylar kóligi jáne avtomobıl joldary basqarmasy byltyrǵy qyzmetin qorytyndylady. Basty máselelerdiń biri joldardyń jaǵasyndaǵy servısti damytý boldy.
B. Aıtbaevtyń aıtýynsha, respýblıkalyq mańyzy bar joldardyń boıyndaǵy 115 nysannyń tek 36-sy ǵana ulttyq standartqa saı keledi. Bir jylda tek úsh nysannyń ǵana jaǵdaıy jaqsartylǵan.
«Aýdandar men Pavlodar qalasynyń ákimdikterine ulttyq standartqa sáıkestendirý qajet nysandardyń tizimin berdik. Olardyń sany - 53. Nysandardy talapqa saı etý úshin modýldi dárethanalardy ornatyp, janarmaı beketterinde bólshek saýda oryndaryn ashýdyń ózi jetip jatyr. Bul jalpy nysandardyń 77%-yn «C» jáne «D» sanattarynyń deńgeıine kóteredi», - deıdi B. Aıtbaev.
Onyń aıtýynsha, fılıal bıyl «Kókshetaý - Omby» avtojolynyń boıynda ornalasqan Chkalovo aýylynda «Kaz Way» jol pavılonyn salýdy josparlap otyrǵanyn jetkizdi.
«Kúrdeli jóndeý aıasynda fılıal M-51 «Chelıabi - Novosibir» avtojolynda, Býlaevo qalasynyń aýmaǵynda demalys ornyn salýdy josparlap otyr. Budan tys, «Astana - Petropavl» avtojolyndaǵy «Hýtorok» jáne «Mansur» dámhanalaryna kiretin jáne shyǵatyn joldardy jóndeý josparda bar», - dedi ol.
Oblys ákimi Qumar Aqsaqalov ta aýdan basshylarynyń osy baǵyttaǵy jumystaryn qatań synǵa aldy.
Avtory: Olesıa Jýkoven
