SQO joǵary oqý oryndaryna bólinetin granttar 5 esege artty
PETROPAVL. QazAqparat - Keler jyly Petropavlda M. Qozybaev atyndaǵy Soltústik Qazaqstan memlekettik ýnıversıtetiniń jańa ǵımaraty salyna bastaıdy, dep habarlaıdy QazAqparat.
Bul týraly ákimdik otyrysynda óńir basshysy Qumar Aqsaqalov málim etti. Onyń sózine qaraǵanda, bul barsha zamanaýı talaptarǵa jaýap beretin oqý korpýsy bolmaq.
«Kóp jyldan beri bizdiń ýnıversıtettiń materıaldyq-tehnıkalyq bazasy jańartylmaı keldi. JOO rektory qurylys basqarmasymen birge jobany ázirleýi tıis. Qurylysty keler jyly bastaımyz. Jaramsyz bolyp qalǵan ǵımarattardyń bir bóligin basqa maqsatta paıdalanýǵa beremiz», - dedi Q. Aqsaqalov.
Oblys ákimi, sondaı-aq bıylǵy granttar sany shamamen 5 esege - 1,5 myńǵa deıin artqanyn jetkizdi. Sonyń 500-i «Serpin» baǵdarlamasynyń qatysýshylaryna, qalǵan myń grant aýyldyq bitirýshilerge arnalǵan.
«Jańa mamandyqtar ashylyp jatyr. Sheteldik stýdentter men mamandardy shaqyramyz. Bul baǵyttaǵy jumystardy bastap kettik. Qazir ýnıversıtette 5,5 myń stýdent bilim alyp jatyr, keler jyly olardyń sany 7 myńǵa jetedi dep josparlap otyrmyz. Jyl saıyn JOO materıaldyq-tehnıkalyq bazasy jaqsara bermek», - dedi SQO ákimi.
Bıyl óńirde Petropavl qalasyndaǵy №1 lıtseı bazasynda ІT-lıtseı, budan tys, sport kolledjin ashý josparlanǵan.
