SQO: Jelide memqyzmetshilerdi áshkereleıtin 300-ge jýyq materıal anyqtaldy
PETROPAVL. QazAqparat - Soltústik Qazaqstan oblysy boıynsha Etıka keńesi 2017 jyldyń qorytyndylaryn jarııalady, dep habarlaıdy «QazAqparat» HAA Memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary, etıka jónindegi ókil Janat Jumabaevqa silteme jasap.
13 otyrysta 37 tártip isi qaralǵan. 18 memlekettik qyzmetshi abyroıyn tógetin áreketteri úshin jaýapqa tartylyp, sonyń bireýi qyzmetinen qýylǵan, taǵy ekeýi laýazymnan alynǵan. Taǵy 13 memlekettik qyzmetshi qyzmet etıkasyn buzǵany úshin jazalandy. 6 is qyzmetshiniń abyroıyn tógetin áreketteri bolmaýyna baılanysty toqtatyldy.
Jaýapqa tartylǵandardyń arasynda jergilikti atqarý jáne aýmaqtyq organdardyń 26 qyzmetkeri, 5 aýyldyq okrýg ákimi bar.
Janat Jumabaevtyń aıtýynsha, memlekettik qyzmetshilerdiń arasynda mas kúıinde kólik júrgizý, halyq aldynda júrý faktileri jıi kezdesip otyrady.
«Mas kúıinde kólik júrgizgeni úshin Aıyrtaý aýdany ákimdiginiń dene shynyqtyrý jáne sport bóliminiń basshysyna, Aleksandr aýyldyq okrýginiń ákimine qatysty is qaraldy», - deıdi ol.
J. Jumabaevtyń aıtýynsha, Toranǵul aýyldyq okrýginiń ákimi JShS-terdiń biriniń qyzmetshisine qatysty óreskel áreketterge barǵan, Amangeldi aýyldyq okrýginiń ákimi jumys kezinde toı jasap, toı ornyn jınastyrýǵa memlekettik organ qyzmetshilerin jumyldyrǵan.
«2017 jyly SQO memlekettik organdarynda qyzmettik etıka normalaryn buzǵany úshin 42 qyzmetshi tártiptik jaýapqa tartyldy. Departament SQO memqyzmetshileriniń áleýmettik jelilerine monıtorıng júrgizip, olardyń abyroıyn tógetin 283 materıaldy anyqtady. Basshylarǵa tıisti sharalar qaraýy úshin aqparattyq hat jiberildi, fotosýretter óshirildi», - deıdi J. Jumabaev.
