SQO jármeńkesi: Elordalyqtarǵa azyq-túlik naryqtaǵy baǵadan 10-15 paıyzǵa arzanǵa satylýda

NUR-SULTAN. QazAqparat - Elordada Pavlodar óńirimen qatar Soltústik Qazaqstannan jetken saýda kerýeni elordalyqtarǵa aýyl sharýashylyǵy ónimderin arzan baǵamen usynyp jatyr, dep habarlaıdy QazAqparat tilshisi.

Soltústik Qazaqstannyń sút ónimderi men baly, eti men kókónisin alyp jatqandar kóp. Aımaqtyq jármeńkelerdi túıindegeli otyrǵan óńir elordalyqtarǵa osynyń bárin arzan baǵamen berip jatyr.

«Astanaǵa azyq-túligimizdi tıep, sharýalarymyzdy jumyldyryp jylda kelemiz. Búgin azyq-túlik ónimderiniń aýqymdy assortımentimen jettik. 500 tonnaǵa jýyq kókónis, kartop, sábiz, oramjapyraq ákeldik. Ózińiz baqylap kórseńizder ónimderimizdiń bári de arzanǵa berilýde. Odan bólek sıyr, jylqy, qoı etteri de jetkizildi. Sıyr eti ortasha eseppen 1700 teńgeden satylýda. Óńirimizde Qazaqstannyń brendti kompanııalarynyń biri sanalatyn «Zenchenko» kompanııasy bar. Osy joly atalmysh kompanııa ónimin naryqtaǵy baǵadan 10-15 paıyzǵa arzanǵa usynyp otyr», - deıdi Soltústik Qazaqstan oblysynyń aýyl sharýashylyǵy basqarmasynyń basshysy Erbolat Bekshınov.

Basqarma basshysy ákelingen ónimder eki kúnniń ishinde ótip ketetinine senimdi. Qazir halyq eń aldymen sút pen et ónimderin talasa-tarmasa alyp jatyr.

«Áleýmettik mańyzy bar azyq-túliktiń 29 túri boıynsha árdaıym monıtorıng júrgizilip otyratyny belgili. Solardyń 24 túri bizdiń óńirde óndiriledi. Máselen Soltústik Qazaqstanda sút ónimderi óńir qajettiginen 20 ese artyq – jylyna 560 myń tonna shyǵarylady. Et te úsh ese artyq óndiriledi», - deıdi ol.

Jármeńke barysynda sondaı-aq Nur-Sultan qalasynyń ınvestıtsııalar jáne kásipkerlikti damytý basqarmasynyń basshysy Gúlmıra Ermoldına bıyl 12 óńir astanada jármeńke ótkizgenin aıtady. Sol jármeńkelerdiń barysynda 400 myń tonna ónim satylǵan.

«Jármeńkelerdegi ónimge degen halyqtyń suranysy jaqsy», - deıdi ol.