SQO jáne Aqmola oblysyndaǵy jabylǵan joldarǵa túni boıy arnaıy qospa sebildi

"QazAvtoJol" UK" AQ Soltústik Qazaqstan fılıaly basshysynyń orynbasary Qanat Óserbaev óńirdiń respýblıkalyq mańyzy bar avtomobıl joldaryndaǵy jaǵdaı týraly baıandady, dep habarlaıdy Kazinform QazAvtoJol kompanııasyna silteme jasap.

"Ótken túnde kúre joldardyń jabyq ýchaskelerinde (SQO jáne Aqmola oblysynda) kóktaıǵaqty aldyn-alý úshin 111 birlik arnaıy tehnıka men 260-qa jýyq maman jumyldyryldy. Jolshylar 300 m3 qum-tuz qospasyn paıdalandy" delingen habarlamada.

Kún raıynyń buzylýyna baılanysty keshe «Kókshetaý – Rýzaevka» kúre jolynyń eki ýchaskesi jabyldy. Birinshi ýchaske – Aqmola óńiriniń shekarasynan Rýzaevka aýylyna deıin (SQO terrıtorııasy). Ekinshi ýchaske – Kókshetaý qalasynan SQO shekarasyna deıin (Aqmola oblysynyń terrıtorııasy).

Eske salaıyq, keshe saǵat 20.00-den bastap Aqmola oblysynda «Kókshetaý – Atbasar» trassasynda kóliktiń barlyq túrine qozǵalysqa tyıym salyndy.