SQO: Jaǵarǵa otyny bolmaǵan zaǵıp jan óz úıinde úsip qala jazdady
PETROPAVL. QazAqparat - Soltústik Qazaqstan oblysynyń polıtseıleri kúnniń kúrt sýytýyna baılanysty jalǵyzbasty turǵyndardy baqylaýǵa aldy. Nátıjesinde eki birdeı qaıǵyly oqıǵanyń aldyn alyp, zeınetkerlerdi ajaldan arashalap qaldy, dep habarlaıdy QazAqparat tilshisi.
SQO Polıtsııa departamentiniń baspasóz qyzmetinen málim etkendeı, Aqqaıyń aýdanynyń 57 jastaǵy turǵynyn óz úıinde tońyp jatqan jerinen ýchaskelik polıtsııa ınspektory men aýyldyq okrýg ákimi taýyp alǵan. Anyqtalǵandaı, onyń jaǵarǵa otyn-kómiri bolmaǵan. Zaǵıp jan endi aıaz synǵansha jergilikti aýrýhanada bolady.
Al Jambyl aýdanynyń ortalyǵy Presnovka eldimekeninde 70 jastaǵy zeınetker áıel peshtiń ústindegi belaǵashtyń byqsyp jana bastaǵanyn baıqamaǵan. Úıden qalyń tútin shyǵyp jatqanyn tártip saqshylary beınebaqylaý kameralary arqyly kórip, dereý órt sóndirý jasaǵyn jibergen. Abyroı bolǵanda úı ıesi zardap shekken joq.
Petropavlda ýchaskelik polıtsııa ınspektorlary aıazdyń qursaýynda qalǵan jalǵyzbasty zeınetkerlerdi, kópbalaly otbasylardy, turǵylyqty mekenjaıy joq tulǵalardy anyqtaý maqsatymen ár úıdi aralaýda. Qazirgi ýaqytta qalalyq tártip saqshylary zeınetkerler men múgedekter turyp jatqan 100-den astam baspanany, kámeletke tolmaǵan balalalary bar turmysy tómen 21 otbasyn tekserdi. Polıtseılerdiń aıtýlarynsha, qyzmet atqarýdyń kúsheıtilgen túri aıazdyń beti qaıtqansha jalǵaspaq.
