SQO: Zarechnyı kentiniń turǵyndaryn shuǵyl evakýatsııalaý tapsyryldy
ASTANA. KAZINFORM - Premer-Mınıstrdiń birinshi orynbasary Roman Sklıar Zarechnyı kenti Ýşev kóshesi men Prıbrejnoe aýyly boıyndaǵy bógetterdi aralady, Oıqaladaǵy sý tasqynyna qarsy qorǵanys bekinisteriniń daıyndyǵyn tekserdi, evakýatsııalaý pýnktiniń daıyndyǵyn zerdelep, Petropavl qalasynyń ákimi Serik Muhamedıevtiń baıandamasyn tyńdady. Onyń qorytyndysy boıynsha Zarechnyı kentinde turatyn 239 turǵyndy evakýatsııalaýdy bastaýdy tapsyrdy.
Qala ákimi úlken sýdyń kentke úsh kúnde jetetinin habarlady. Ol nyǵaıtylǵan bóget sýdyń birinshi aǵynyn ǵana ustaıtynyn atap ótti. Alaıda, boljam boıynsha, saıajaı aýmaǵyna jan-jaqtan sý tasqyny keledi jáne 200 úıdiń 132-ne qaýip tónip tur. Birinshi vıtse-premer tez arada azamattardy evakýatsııalaýdy bastaýdy tapsyrdy.
«Adamdarǵa 2017 jylmen salystyrǵanda, bıylǵy sý tasqynynyń aýqymdy ekenin túsindirý kerek, óıtkeni aýyl oıda ornalasqan jáne ınjenerlik qurylystar sýdyń kóterilýine shydamaýy múmkin, turǵyndardy evakýatsııalaý úshin eki kún bar», — dedi ol.
Sondaı-aq Roman Sklıar evakýatsııalaýdan bas tartqan turǵyndarmen túsindirme áńgime júrgizip, jazataıym oqıǵalardy boldyrmaý úshin saıajaı aımaǵynan otbasylardy kóshirýdi baqylaýǵa alýdy tapsyrdy.
«Azamattarǵa aldaǵy sý tasqynynyń aýyrlyǵyn túsindirińizder. Sergeev sý qoımasynan kóp sý keledi, sondyqtan aýmaqty qatty sý basady. Bógetti nyǵaıtý jedeldetilgen túrde aıaqtaldy, biraq ol tek sý az kezeńderinde qorǵaı alady. Sondyqtan munda turatyndardy dereý evakýatsııalaý kerek. Eshkim zardap shekpeýi qajet», — dep túıindedi Sklıar.
Premer-Mınıstrdiń birinshi orynbasary Sergeev sý qoımasynyń búkil tarıhyndaǵy sý tasqynynyń absolıýtti maksımaldy kezeńine jetkenin atap ótti. Ol barlyq esepteý júrgizilgenin, 12-14 sáýir aralyǵynda Petropavl qalasyna úlken sý keletinin túsindirdi.
Roman Sklıar «Qyzyljar Sý» JShS sorǵy stantsııasynyń strategııalyq ýchaskesindegi bógetti nyǵaıtý úshin sý tasý qaýpin barynsha azaıtýdy, arnaıy tehnıkany jumyldyrýdy, ınertti materıaldarmen jáne jumys kúshimen qamtamasyz etýdi tapsyrdy.
«Sorǵy stantsııasyna keletin bolsaq, bul – strategııalyq mańyzdy nysan. Biz qysqa merzimde qosymsha bógetti turǵyzdyq. Onyń jumysy qamtamasyz etiledi. Qosymsha dızel generatory ornatyldy. Qala kez kelgen jaǵdaıda úzilissiz sýmen qamtamasyz etilýi kerek. Josparlaǵan jumystardyń barlyǵy jalǵasyn tabady. Odan ári ózennen tómen qaraı, Qyzyljar óńirinde jańa bógetterdi salýdy bastaımyz. Mindet – eldi mekenderdi qorǵaý. Biz qazirgi jaǵdaıǵa sáıkes, burynnan belgilengen josparlar boıynsha jumys isteıtin bolamyz», — dep túıindedi Sklıar.
Jumys saparynyń qorytyndysy boıynsha Premer-Mınıstrdiń birinshi orynbasary jol ınfraqurylymynyń sý tasqynyna daıyndyǵyn tekserip, «QazAvtoJol» oblystyq fılıalynyń dırektory A. Qabyldınge aınalma jol boıynda azamattyq kóliktiń qaýipsiz qozǵalysy úshin táýlik boıy kezekshilik uıymdastyrýdy tapsyrdy.
