SQO zańgerleri halyqty tegin qabyldap, keńes berdi
PETROPAVL. QazAqparat – Soltústik Qazaqstan oblysynda «Halyq zańgeri» jalpyrespýblıkalyq aktsııasy aıasynda 600-den astam turǵyn zańgerlerdiń qabyldaýynda bolyp, tegin kásibı keńes aldy, dep habarlaıdy QazAqparat tilshisi.
SQO Sybaılas jemqorlyqqa qarsy qyzmet mamandarynyń málimetinshe, «Halyq zańgeri» jalpyrespýblıkalyq naýqany elimizde dástúrli túrde uıymdastyrylyp keledi.
«Bul, elimizdiń barlyq iri qalalarynda ótetin jyl saıynǵy is-shara. Naýqandy Sybaılas jemqorlyqqa qarsy is-qımyl agenttigi, zakon.kz jelilik basylymy, «Paragraf» aqparattyq júıesi, sondaı-aq Qazaqstannyń úzdik zańgerleri jáne advokattary uıymdastyryp otyr. Olardyń arasynda belgili advokattar, notarıýstar, sot oryndaýshylary, polıtseıler, ádilet, kóshi-qon polıtsııasynyń qyzmetkerleri jáne memlekettik organdardyń basshylary bar» - dedi oblystyq Sybaılas jemqorlyqqa qarsy qyzmettiń basshysy Ernar Baıanǵazın.
Petropavlda shara «Dostyk Mall» saýda, oıyn-saýyq ortalyǵynda ótti. Onda túrli saladan usynylǵan 30-dan astam kásibı zańger oblys ortalyǵynyń turǵyndaryna tegin zańgerlik kómek kórsetti. Halyqtyń quqyqtyq saýattylyǵyn arttyrýǵa septigin tıgizdi.
Turǵyndardyń deni jer qatynastary, múgedektik berý, salyq aýdarymdary, áleýmettik qorǵaý, sot aktilerin oryndaý, zeınetaqy aýdarymdary, neke buzý protsesteri men múlikti bólýge qatysty máseleler boıynsha mamandardyń kómegine júgindi.
«Tanymal advokattar men kásibı bilikti mamandardan tegin keńes alýǵa múmkindik bergenderi úshin rızamyz. Biz sııaqty qarapaıym azamattarǵa paıdasy mol is-shara. Ásirese, zańger Sergeı Sızıntsevqa alǵys bildiremin. Meniń máselemdi bastan-aıaq tyńdap, ony sheshýdiń jolyn túsindirip berdi», - dedi aktsııaǵa kelgen qala turǵyny.
«Halyq zańgeriniń» bıylǵy ereksheligi – onyń oblys aýdandarynda bir ýaqytta ótkizilýinde. Osylaısha uıymdastyrýshylar shalǵaı ornalasqan eldi mekenderdiń azamattaryn da umyt qaldyrmady. SQO boıynsha 600-den astam adam mamandardyń keńesin aldy.
