SQO: Úsh ret mas kúıde ustalǵan júrgizýshi bas bostandyǵynan aıyrylatyn boldy
PETROPAVL. QazAqparat – Soltústik Qazaqstan oblysynda ótken demalys kúnderi mas júrgizýshilerdiń kinásinen eki jol-kólik oqıǵasy tirkeldi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Aqjar aýdany Gorkovskoe eldi mekeninde «Prıora» avtokóliginiń júrgizýshisi metall arkaǵa soǵylyp, qorshaýlardy zaqymdaǵan. Medıtsınalyq kýálandyrý 42 jastaǵy aýyl turǵynynyń mas ekenin rastady. Ol bir jyldyń ishinde osymen úshinshi ret polıtsııaǵa mas kúıde ustalyp otyr.
Birinshi ret aqpan aıynda ol kólikti mas kúıde basqarǵany úshin júrgizý quqyǵynan 7 jylǵa aıyrylǵan jáne 15 táýlikke ákimshilik qamaýǵa alynǵan, alaıda bul oǵan sabaq bolmapty. Shilde aıynda osyǵan uqsas quqyq buzýshylyq jasaǵany úshin ol sot úkimimen qoǵamdyq jumystarǵa tartyldy jáne ómir boıyna kólik júrgizý quqyǵynan aıyryldy. Úshinshi ret ustalǵan ol endi qylmystyq jaýapkershilikke tartylmaq.
Aqqaıyń aýdanynda kólikti mas kúıde basqarýdyń sońy aýyr jaǵdaıǵa ákeldi. Qııaly eldimekeniniń 25 jastaǵy turǵyny spırttik ishimdik ishse de rólge otyryp, Astrahanka aýylynyń mańynda kólik tizginine ıe bola almaı aýdarylǵan. Saldarynan «Mersedes» avtokóliginiń júrgizýshisi túrli dene jaraqatymen aýrýhanaǵa emdelýge jatqyzyldy.
«Masań kúıde rólge otyrǵan júrgizýshi óz ómirine ǵana emes, ózgelerdiń ómirine de qaýip tóndiredi. Bıyl zańnamadaǵy ózgeristerge sáıkes mas kúıde kólik basqarǵandarǵa jaza kúsheıtile tústi. Bul shara azamattardyń sana-sezimin nyǵaıtýǵa baǵyttalǵan», - deıdi SQO PD bastyǵynyń birinshi orynbasary Qanat Aıtbaev.
Jyl basynan SQO joldarynda 851 mas júrgizýshi ustaldy.
