SQO ýnıversıtetine Úndistannan 150 stýdent keledi
Óńirde jańa qurylys nysandary turǵyzylady dep josparlanǵan. Petropavlda sońǵy ret 11 jyl buryn mektep salynǵan. Bul jyldar ishinde mektepterge degen muqtajdyq deńgeıi ósken. Oqýshylar birneshe aýysymmen bilim alýǵa májbúr boldy.
Oblys ákimi Qumar Aqsaqalovtyń aıtýynsha, óńirdiń áleýmettik-ekonomıkalyq damýynyń 2019-2021 jyldarǵa arnalǵan keshendi josparynda Petropavl men Qyzyljar aýdanynyń ortalyǵy Beskól aýylynda taǵy 2 mektep salý qarastyrylǵan.
Mektepterdiń materıaldyq-tehnıkalyq bazasy uzaq ýaqyt boıy jańartylmaǵan. Sońǵy 5 jylda mektep jóndeý jumystaryna 300 mln teńge qarjy bólindi. Jyl saıyn 10-15 mektep jóndeýden ótip turǵan. Kelesi jyly respýblıkalyq bıýdjetten 5 mlrd teńge bólinedi. Bul qarajatqa birden 120 mektepke jóndeý jumysy júrgiziledi.
«Jyl saıyn kompıýter satyp alýǵa 400 mln teńgeden astam qarjy bólinedi. Degenmen, 7 myńnan astam qurylǵynyń tozyǵy jetti. Kelesi jyly birden 4 myń kompıýter satyp alamyz», - dedi oblys ákimi.
Sondaı-aq, óńirdegi jalǵyz joǵary oqý orny M. Qozybaev atyndaǵy Soltústik Qazaqstan memlekettik ýnıversıtetine qatysty sheshilmegen birqatar máseleler bar.
Bilim ordasy úshin jańa zerthanalyq korpýs salýǵa jáne tehnıkanyń sońǵy úlgilerimen jabdyqtaýǵa ýáde berildi. Korpýs salynyp jatqan 2 jyl ishinde óńirdegi stýdentterdiń sanyn 10 myńǵa jetkizý josparlanǵan.
«Bıyl sheteldik stýdentterdi kóptep tartýdamyz. Jaqyn kúnderi Úndistannan 150 stýdent keledi. Sonymen qosa, oqytýshylardy da daıyndadyq. Dál qazir shetelden professorlardy shaqyrtýǵa bar kúshimizdi salyp jatyrmyz», - dedi Q. Aqsaqalov.
Sonymen qatar, QR Ulttyq gvardııasynyń áskerı ınstıtýtyna kazarma men akt zaly bar jańa korpýs salynady.
Budan bólek, óńirde oqýshylar saraıynyń qurylysy aıaqtalýǵa jaqyn. Qurylys barysymen oblysqa jumys saparymen attanǵan Úkimet basshysy Baqytjan Saǵyntaev tanysyp qaıtty.