SQO Ulttyq bıýrosy departamentiniń basshysy dórekiligi úshin eskertý aldy
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov SQO boıynsha sybaılas jemqorlyqqa qarsy is-qımyl ulttyq bıýrosy departamentiniń basshysy Nyǵmetjan Saparovqa eskertý berdi, dep habarlaıdy «QazAqparat» HAA tilshisi.
3 qarashada Qojamjarovtyń blogyna SQO turǵyny Tatıana Vlasova Saparovtyń dórekilik tanytqanyn aıtyp, shaǵym túsirgen.
«2017 jyldyń 3 qarashada 12 saǵat 30 mınýtta Petropavldaǵy «Býlka» dámhanasynda SQO boıynsha memlekettik qyzmet isteri jáne sybaılas jemqorlyqqa qarsy is-qımyl ulttyq bıýrosy departamentiniń basshysy Saparovty kezdestirip, Shal aqyn aýdandyq qadaǵalaýshy prokýrordyń 2017 jyldyń 30 qazanyndaǵy zattaı dáleldi ıesine qaıtarý týraly nusqaýdy oryndamaı júrgen qolastyndaǵy tergeýshi Amantaıdyń áreketsizdik máselesi boıynsha shaǵymdandym. Saparov maǵan dóreki jaýap qaıtardy: «Sen meniń úıime kelip, suraq qoısańshy», - dedi. Men onyń qabyldaýyna kirýdiń qıyn ekenin aıtyp, osy kezdeısoq kezdesýdi paıdalanyp qalǵanymdy habarladym. Saparov taǵy da dóreki jaýap berdi: «Qalaı bolsa solaı kel qabyldaýyma», - dep jazdy ol.
Áıel qysqa ýaqyttyń ishinde sheneýnik tarapynan etıkanyń buzylǵandyǵyna jaýap qaıtarýyn suraǵan. Shaǵym faktisi boıynsha qyzmettik tergeý júrgizilgen. Qojamjarov onyń nátıjesi týraly óziniń blogynda jazdy. «Qurmetti Tatıana Georgıevna! Sizdiń shaǵymyńyz boıynsha qyzmettik tergeý júrgizilip, sonyń nátıjesi boıynsha SQO boıynsha memlekettik qyzmet isteri jáne sybaılas jemqorlyqqa qarsy is-qımyl ulttyq bıýrosy departamentiniń basshysy N.M.Saparovqa eskertý berildi. Tergeýshi T.Amantaıdyń Shal aqyn aýdandyq prokýrorynyń qaýlysyn oryndamaý faktisi joǵaryda atalǵan prokýror sheshiminiń ózgertilýine baılanysty rastalmady. Osy jaýappen kelispegen jaǵdaıda, zańdy túrde shaǵym túsirýge quqylysyz», - dep habarlady Qojamjarov.
