SQO túrmelerinde bir jylda sottalǵandar sany 540 adamǵa artqan

PETROPAVL. QazAqparat – Byltyr Soltústik Qazaqstan oblysynyń túzeý mekemelerinde jazasyn óteýshiler sany 540 adamǵa artqan. Sondaı-aq sottalǵandardyń óz-ózine dene jaraqatyn salý derekteri kóbeıgen, dep habarlaıdy QazAqparat tilshisi.

Soltústik Qazaqstan oblysy boıynsha qylmystyq-atqarý júıesi departamenti ótken jyldy qorytyndylady. Jıynǵa prokýratýra ókili qatysyp, sottalǵandar quqyqtarynyń qorǵalýy qadaǵalaýshy organnyń nazarynda ekenin atap ótti.

Byltyr SQO-nyń túzeý mekemelerinde sottalǵandar sany 540 adamǵa kóbeıgen. «Túrme halqynyń» óskenine qaramastan, qylmystyq-atqarý júıesiniń organdary turaqty, jedel-rejım jaǵdaıyn qamtamasyz etken.

«SQO boıynsha qylmystyq-atqarý júıesi departamentiniń mekemelerinde sottalǵandar tarapynan ózderine dene jaraqatyn keltirý derekteri artqan. Qadaǵalaýshy organ osyndaı árbir jaǵdaıdy búge-shigesine deıin anyqtaýdy jáne naqty sebepterin bilýdi talap etedi. Mekemelerdegi turaqty jaǵdaıǵa qol jetkizý úshin sottalǵandardyń quqyǵyn taptap, olardy kemsitýge jol berilmeýi tıis. Mundaıdyń kez kelgen túrine tyıym salynady», - dedi SQO prokýrorynyń orynbasary Murat Qojamqulov.

Bıyldan bastap azaptaýǵa qatysty isterdi tergeýmen zań boıynsha tek prokýratýra aınalysa alady. Sondyqtan túzeý mekemelerindegi sottalǵandardyń konstıtýtsııalyq quqyǵyn saqtaý jáne azaptaý týraly túsken barlyq aryz-shaǵymǵa der kezinde den qoıý qadaǵalaýshy organnyń basty mindeti.

Osyǵan oraı oblystyń barlyq kolonııalarynda beınebaqylaý júıesi iske qosylǵan. Aryz-ótinishter úshin termınaldar ornatylǵan.