SQO turǵynyna qaban aýlaǵany úshin 4,5 mln teńge aıyppul salynýy múmkin
PETROPAVL. QazAqparat - Soltústik Qazaqstan oblysy Jambyl aýdandyq ІІB qyzmetkerleri zańsyz qaban aýlaý faktisin anyqtady, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Reıd kezinde polıtseıler men qoryqshylar úlken qabannyń izimen júrip otyrǵan mashınanyń izin baıqaıdy. Ormannyń ishinen janýardyń terisi men ishki organdary, 16 kalıbrli ań myltyǵynan atylǵan 4 gılza tabylady.
Mashınanyń izimen kelgen tártip saqshylary «ÝAZ» markaly avtokóliktiń 47 jastaǵy aýyl turǵynyna tıisti ekenin anyqtaıdy. Onyń úıinen qabannyń borshalanǵan eti, IJ-58 markaly myltyq, 20 oq tabylady.
«Er adam ań aýlaýǵa ruqsat beretin qujatyn kórsetken joq. Memleketke jarty mıllıon teńgeden astam zııan keltirilgen. Osy fakti boıynsha QR QK 337-babynyń («Zańsyz ańshylyq»)» 3-bóligine sáıkes sotqa deıingi tergep-tekserý sharalary bastaldy. Baptyń sanktsııasy 2000 AEK mólsherinde aıyppul salý nemese eki jylǵa deıin bas bostandyǵynan aıyrý jazasyn berýdi kózdeıdi», - deıdi SQO ІІD baspasóz qyzmetindegiler.
Aǵymdaǵy jyldyń 10 aıynda SQO-da 785 tabıǵatty qorǵaý zańnamasyn buzý faktisi tirkelgen. Ekologııalyq qylmystar boıynsha 126 qylmystyq is qozǵalǵan.
