SQO turǵyny joldyń sapasyzdyǵyna Jemqorlyqqa qarsy qyzmetke aryzdandy

PETROPAVL. QazAqparat –Jarty mıllıard teńgege ortasha jóndeý jumystary júrgizilgen avtojoldyń sapasyna kóńili tolmaǵan Soltústik Qazaqstan oblysynyń turǵyny Sybaılas jemqorlyqqa qarsy qyzmetke aryzdandy, dep habarlaıdy QazAqparat tilshisi.

SQO Sybaılas jemqorlyqqa qarsy qyzmet mamandarynyń málimetinshe, turǵynnyń shaǵymy negizinde «Novonıkolskoe-Andreevka-Bostandyq-Novomıhaılovka» tasjolynyń sapasyna monıtorıng jasaldy. Oǵan departament qyzmetkerlerimen birge oblystyq Jolaýshylar kóligi jáne avtomobıl joldary basqarmasy, Jol aktıvteriniń ulttyq ortalyǵy qatysty.

Monıtorıng barysynda birqatar talaptardyń buzylǵandyǵy anyqtaldy.

«Jol aktıvteriniń ulttyq ortalyǵy asfalttan úsh synama alyp, zerttedi. Onyń bireýi jol reglamenti standarttaryna sáıkes kelmedi. Asfaltty qabattyń bıiktigi 4 sm ǵana. Bul - belgilengen normadan tómen. Sondaı-aq jol ústindegi asfalttyń jarylǵany anyqtaldy», - delingen habarlamada.

Joldyń bul ýchaskesine ortasha jóndeý jumystaryn «Nord Joldary» JShS 2017 jyly júrgizgen eken. Kepildeme ýaqyty áli bitpegen.

Ulttyq ortalyq ınjeneriniń aıtýynsha, monıtorıng qorytyndysy boıynsha akti jasalyp, olqylyqtardy joıý úshin merdigerge jiberildi. Al synamalar boıynsha qorytyndy saraptamanyń nátıjesinen keıin belgili bolady.