SQO turǵyny týysynyń kámeletke tolmaǵan qyzyn jezókshelikke tartqan
NUR-SULTAN. QazAqparat - Qazaqstannyń barlyq óńirlerinde «STOP trafık» operatsııasynyń kezekti kezeńi ótti, dep habarlaıdy QazAqparat Іshki ister mınıstrliginiń baspasóz qyzmetine silteme jasap.
Sharanyń maqsaty - adam saýdasy, zańsyz bas bostandyǵynan aıyrý, jezókshelikpen aınalysýǵa tartý, prıtondar men jeńgetaılyqty uıymdastyrý faktilerin eskertý jáne anyqtaý.
Jedel profılaktıkalyq shara barysynda 48 qylmys anyqtaldy, onyń ishinde 3 fakti - saýdalaý maqsatynda bas bostandyǵynan aıyrý, ekeýi – adam saýdasy, 8 – jezókshelikpen aınalysý, onyń ishinde bir fakti kámeletke tolmaǵandy tartý. 35 fakti jezókshelikpen jáne jeńgetaılyqpen aınalysý úshin prıtondar uıymdastyrǵany jáne ustaýyna baılanysty tirkeldi.
Máselen, Almaty qalasynda 2 pornografııalyq stýdııanyń jumysyn uıymdastyrǵan qyrǵyzstandyq er adam men qazaqstandyq áıel ustaldy. Olar bul stýdııada pornofılmderdi onlaın rejımde túsirip, Internet jelisinde kórsetip otyrǵan. Atalǵan fakti negizinde QK 311-baby boıynsha qylmystyq is qozǵaldy.
Atyraý oblysynda eki apta boıy kúsh kórsetý arqyly Ózbekstan azamatyn qaıyrshylyqpen aınalysýǵa májbúrlegen jergilikti turǵyn ustaldy. Qazirgi ýaqytta Qylmystyq kodekstiń 128-baby boıynsha sotqa deıingi tergep-tekserý bastaldy.
Operatsııa barysynda Soltústik Qazaqstan oblysynyń polıtsııa qyzmetkerleri týysqanynyń kámeletke tolmaǵan qyzyn jezókshelikpen aınalysýǵa tartý faktisin anyqtady. Bul jaǵdaı boıynsha da qylmystyq is qozǵalǵan.
Qostanaı oblysy Jitiqara aýdanynyń polıtseıleri 40 jastaǵy jergilikti turǵyndy ustady. Ol 2013 jyldan beri 33 jastaǵy er adamdy eńbekke paıdalaný maqsatynda zańsyz ustaǵan. Osy faktige baılanysty Qylmystyq kodekstiń 126-baby 3-bóligi 2-tarmaǵy boıynsha sotqa deıingi tergeý júrip jatyr.
Aqmola oblysynda monsha kesheniniń 40 jastaǵy ákimshisi ustaldy. Ol aqshalaı syıaqyǵa klıentterge jynystyq qyzmet kórsetetin qyzdardy usynyp otyrǵan. Atalǵan fakti boıynsha jeńgetaılyq jáne prıton ustaǵany úshin ákimshi men monsha kesheniniń ıesine qatysty qylmystyq is qozǵaldy.
Jalpy, jezókshelikpen nemese jeńgetaılyqpen aınalysý úshin úı-jaı usynǵany úshin 13 ákimshilik quqyq buzý faktisi tirkeldi.
Jeke basyn anyqtaý úshin ІІO-nyń arnaıy mekemelerine 33 adam qamaldy, onyń ishinde 13-i – Qazaqstan azamaty, 20-sy – TMD elderiniń azamattary.
