SQO turǵyny tólem termınalyn buzyp jatqan jerinde ustaldy

PETROPAVL. QazAqparat – Petropavlda polıtseıler tólem termınalyn buzýǵa árekettengen er adamdy ustady, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda tańǵy saǵat 5.00 shamasynda «102» arnasyna kýágerler habarlasyp, belgisiz adamnyń Jambyl jáne Internatsıonal kósheleriniń qıylysynda ornalasqan termınaldy buzbaq bolyp jatqanyn habarlady. Er adamnyń qolynda temir zaty bolǵan. Jedel basqarý ortalyǵynyń operatory kamerany oqıǵa ornyna qaraı baǵyttap, aqparatty rastady.

Jaqyn mańda júrgen patrýldik polıtsııa ekıpajy er adamdy ustap, Petropavl qalalaq polıtsııa basqarmasynyń ekinshi polıtsııa bólimine jetkizdi.

Ustalǵan kúdikti Ekibastuz qalasynda týǵan buryn sottalǵan 27 jastaǵy jigit bolyp shyqty. Medıtsınalyq kýálandyrý onyń mas ekendigin kórsetti. Urlyq jasaýǵa oqtalý faktisi sotqa deıingi tergep-tekserýlerdiń biryńǵaı tizilimine «Urlyq» baby boıynsha engizildi.

«Beınebaqylaý kameralary — zań buzýshylyqtardy anyqtaýda jáne jolyn kesýde, qylmystardy «izin sýytpaı ashýda» senimdi qural. Jyl basynan beınebaqylaý ınspektorlary 14 myńnan astam ákimshilik quqyq buzýshylyqty anyqtady, onyń 12 myńǵa jýyǵy jol júrisi erejelerin buzýǵa qatysty. Sondaı-aq qylmystardy ashýǵa yqpal etken 146 fakti anyqtaldy», - deıdi Jedel basqarý ortalyǵynyń bastyǵy Erik Quljanov.