SQO turǵyny tanysynyń atynan bes nesıe alǵan
PETROPAVL. QazAqparat - Soltústik Qazaqstan oblysynyń polıtseıleri ınternet alaıaqtyq jasaǵan eki kúdiktini ustady, dep habarlaıdy QazAqparat tilshisi.
Polıtsııa departamenti baspasóz qyzmetiniń aqparaty boıynsha, krımınaldyq polıtsııa basqarmasynyń qyzmetkerleri alaıaqty ustaý úshin basqa qalaǵa barǵan.
Almatyda 23 jastaǵy Soltústik Qazaqstan týmasy qolǵa tústi. Ol ońtústik astanada bilim alyp júrgen.
« Bul joly qaskúnem óziniń jerles tanysyn aldap soqqan. Ol stıpendııasyn aýdarý úshin jeke kýáligi men bank kartasynyń sýretterin jiberýin suraǵan. Іs júzinde, onyń atynan shaǵyn nesıeleý uıymdarynan 30-50 myń teńge kóleminde 5 qaryz alǵan. Zardap shegýshi bul týraly bir aı ótkennen keıin, nesıe berýshi qaryzyn qaıtarýyn suraǵanda bir-aq bilgen», - dedi baspasóz qyzmetinen.
36 jastaǵy Temirtaý qalasynyń turǵyny ınternet-alaıaqtyqtyń eń jeńil túrin qoldanǵan - Qiwi-ámııanǵa aldyn ala tólem jiberýin suraǵan. Áleýmettik jeliden qujattardy jáne qundy zattardy joǵaltyp alǵany týraly habarlamany kórip, taýyp alǵanyn aıtqan jáne syıaqyǵa olardy qaıtaryp berýge ýáde etken. Aqshany alǵannan keıin baılanysqa shyqpaı qoıǵan.
«Eki fakti de Sotqa deıingi tergeýdiń biryńǵaı tirkelimine «Alaıaqtyq» baby boıynsha engizildi. Kúdiktiler qaladan shyqpaý týraly qolhat bergen. Olardyń basqa da qylmystarǵa qatysynyń bar-joǵy anyqtalyp jatyr», - dedi baspasóz qyzmetinen.
